ᐃᓂᒃᑳᓕᐊᖑᓚᐅᑲᒃᑯᑦ ᐅᑭᐅᖅᑕᖅᑐᒥᐅᑕᐅᖃᑎᒌᑦᑐᓂ ᓯᕗᓕᖅᑎᐅᖃᑎᒌᓐᓂᕐᒧᑦ ᐊᑐᖅᑕᐅᓂᐊᖅᑐᒧᑦ

ᒥᐊᓕ ᓴᐃᒪᓐᒥᑦ, ᒥᓂᔅᑕᐅᑉ ᑎᒃᑯᐊᖅᓯᒪᔭᖓ ᑭᒡᒐᖅᑐᐃᔨᖓ
ᐅᑐᐱᕆ 31, 2016

ᐃᓱᒪᒋᔭᐅᔪᑦ ᑕᐅᑐᙳᐊᖅᑕᐅᔪᓪᓗ ᐅᕙᓂ ᐃᖕᒥᒃᑰᖅᑐᒥ ᐅᓂᒃᑳᓕᐊᕐᒥ ᐱᒋᔭᐅᕗᑦ ᒥᐊᓕ ᓴᐃᒪᓐᒧᑦ, ᒥᓂᔅᑕᐅᑉ ᑎᒃᑯᐊᖅᓯᒪᔭᖓ ᑭᒡᒐᖅᑐᐃᔨᖓ ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑎᒌᖕᓂᕐᒧᑦ. ᐃᓱᒪᒋᔭᐅᙱᑐᐃᓐᓇᕆᐊᓖᑦ ᑕᐅᑐᙳᐊᖅᑕᐅᙱᑐᐃᓐᓇᕆᐊᖃᖅᖢᑎᒡᓗ ᑲᓇᑕᐅᑉ ᒐᕙᒪᑐᖃᖓᓄᑦ.

ᐃᓗᓕᖏᑦ

ᐱᒋᐊᕈᑎᖓ

ᖁᕕᐊᑉᐳᖓ ᑐᓴᖅᑎᒍᓐᓇᕋᒃᑭᑦ ᑲᔪᓯᕙᓪᓕᐊᔪᓂᒃ ᐱᓕᕆᐊᕆᓯᒪᓕᖅᑕᒃᑲᓂᒃ ᑎᒃᑯᐊᖅᑕᐅᓚᐅᖅᑎᓪᓗᖓ ᒥᓂᔅᑕᒥᒃ ᑭᒡᒐᖅᑐᐃᔨᒻᒪᕆᐅᓂᕐᒧᑦ ᒥᓂᔅᑕ ᐸᓇᑦᒧᑦ ᐅᓪᓗᖓᓂ ᐊᒡᒌᓯ 5, 2016 ᑲᒪᕙᓪᓕᐊᓂᐊᖅᑎᓪᓗᖓ ᐅᑭᐅᖅᑕᖅᑐᒥᐅᑕᐅᖃᑎᒌᑦᑐᓂ ᓯᕗᓕᖅᑎᐅᖃᑎᒌᓐᓂᕐᒧᑦ ᐊᑐᖅᑕᐅᓂᐊᖅᑐᒧᑦ. ᓯᕗᓪᓕᖅ ᐱᓕᕆᓂᖅ ᐱᔾᔪᑎᖃᓗᐊᖅᓯᒪᔪᖅ ᐅᖃᖃᑎᖃᖅᐸᓪᓕᐊᓂᕐᒥᒃ ᐊᔾᔨᒌᙱᑦᑐᓂᒃ ᐊᒥᓱᒻᒪᕆᓐᓂᒃ ᓯᕗᓕᖅᑎᓂᒃ ᐊᒻᒪᓗ ᖃᐅᔨᒪᔪᒻᒪᕆᓐᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ (ᑕᑯᓗᒍ ᐅᐃᒍᖓ 1 ᓇᐃᓈᖅᓯᒪᔪᑦ ᓇᓗᓇᐃᖅᓯᒍᑏᑦ). ᐅᖃᖃᑎᖃᖅᐸᓪᓕᐊᓂᖅ ᐃᓱᓕᓐᓂᐊᖏᑦᑐᖅ ᒫᓐᓇᒃᑯᑦ, ᐅᖃᖃᑎᖃᕆᐊᒃᑲᓐᓂᕐᓂᖅ ᐸᕐᓇᑕᐅᓯᒪᓪᓗᑎᒃ ᑐᖏᓕᐊᓄᑦ ᐱᓕᕆᐊᑉ ᓱᕐᕌᓂᖓ II.

ᐱᒋᐊᕈᑎᖃᕐᓗᖓ ᐅᖃᐅᓯᕆᓗᒍ ᑐᓗᑐ-ᐅᐹᒪ [Trudeau-Obama] ᐅᖃᐅᓯᕆᓯᒪᔭᖓ ᐱᓕᕆᖃᑎᒌᓐᓂᖅ ᐅᑭᐅᖅᑕᖅᑐᒥᐅᑕᐅᖃᑎᒌᑦᑐᓂ ᓯᕗᓕᖅᑎᐅᖃᑎᒌᓐᓂᕐᒧᑦ ᐊᑐᖅᑕᐅᓂᐊᖅᑐᒧᑦ ᑐᓴᕈᒥᓇᖅᑐᖅ ᐱᓕᕆᐊᕆᔭᐅᓂᐊᕐᓂᖓᓄᑦ ᐱᔾᔪᑎᖃᕐᓗᑎᑦ ᐱᓇᓱᐊᖃᑎᒌᑦᓯᐊᓂᕐᒥ. ᐃᓱᒪᒋᔭᐅᑦᓯᐊᕈᓂ, ᐊᑐᓕᖅᑎᑕᐅᓕᕐᓗᓂᓗ ᓄᓇᕐᔪᐊᒥᐅᑕᐅᖃᑎᒌᓐᓂᕐᒧᑦ ᑲᑎᒪᔨᕐᔪᐊᖏᑦ ᐅᖃᕈᑎᒋᓯᒪᔭᖓ ᐱᔪᓐᓇᐅᑎᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᓕᒫᑦ ᐊᒻᒪᓗ ᓱᓕᔪᓂᑦ ᒪᒥᓴᕐᓂᕐᒧᓪᓗ ᑭᓪᓕᓯᓂᐊᕐᓂᖅ ᑲᓇᑕᓕᒫᒥ: ᐊᑐᓕᖁᔨᒍᑏᑦ, ᒪᑐᐃᕐᓯᓂᐊᖅᑐᖅ ᓄᑖᒥᒃ ᓄᓇᖃᖅᑳᖅᓯᒪᔪᓄᑦ ᓄᓇᖃᖅᑳᖅᓯᒪᙱᑦᑐᓄᓪᓗ ᐱᓕᕆᖃᑎᒌᓐᓂᕐᒥᒃ ᐱᖃᓐᓇᕇᓐᓂᖅᓴᐅᓕᕐᓗᑎᓗ. ᐊᑐᖃᑦᑕᖅᓯᒪᓕᖅᑕᒃᑲ ᓯᕗᓕᖅᑎᐅᓂᒃᑯᑦ ᐃᓚᐅᑎᑦᓯᑦᓯᐊᕐᓂᖅ ᐊᓚᒃᑲᐃᕙᑦᑐᖅ ᐱᓇᓱᐊᖃᑎᒌᑦᓯᐊᓂᕐᒥ ᐊᒻᒪᓗ ᐊᑐᓪᓚᕆᑦᑐᒃᑯᑦ ᒪᒥᓴᕐᓂᖃᑦᓯᐊᓂᕐᒥ. ᑐᓴᓕᖅᑭᑦᑖᖏᓐᓇᓕᕋᒃᑯ ᑲᓇᑕᐅᑉ ᓯᕗᓕᖅᑎᕐᔪᐊᖓ ᐅᖃᕆᐊᒃᑲᓐᓂᖃᑦᑕᑎᓪᓗᒍ ᐊᑐᕈᒪᓪᓚᕆᓐᓂᕐᒥᓂ "ᐳᓚᕋᕈᑎᖃᕐᓂᒃᑯᑦ, ᑐᓵᓂᒃᑯᑦ ᐃᓕᓐᓂᐊᓂᒃᑯᓪᓗ". ᑕᒪᓐᓇ ᑐᙵᕕᒋᓪᓗᒍ ᐊᖏᕈᑎᒋᓕᓚᐅᖅᑕᕋ ᐱᓇᓱᐊᕈᑎᒋᓂᐊᕐᓗᒍ ᒥᓂᔅᑕ ᐸᓇᑦ ᐅᖃᐅᔾᔨᒋᐊᖅᑎᒻᒪᕆᐅᓂᖓ ᑕᐃᒪᐃᒻᒪᓗ ᐊᕐᕕᑕᖃᑦᑕᓚᐅᖅᑐᖓ ᐅᖃᖃᑎᖃᕆᐊᖅᑐᓂᒃᑯᑦ ᐅᑭᐅᖅᑕᖅᑐᒥ ᓯᕗᓕᖅᑎᓂᒃ ᑐᖏᓕᐅᕕᖃᐅᑎᖏᓪᓗ, ᖃᐅᓯᓴᕐᒃᑎᕐᔪᐊᓂ, ᑭᒡᒐᖅᑐᐃᔨᓂᒃ ᐱᓕᕆᕕᕐᔪᐊᓂ, ᒐᕙᒪᐅᙱᑦᑐᓂ ᑎᒥᐅᔪᓂᒃ, ᒪᒃᑯᑦᑐᓂᓪᓗ ᓄᑖᒥᒃ ᐅᑭᐅᖅᑕᖅᑐᒥ ᑐᕌᖅᐸᓪᓕᐊᒍᑎᑦᓴᓂᒃ, ᐱᒋᐊᖅᕈᑎᒋᓪᓗᒍ ᐅᖃᖃᑎᒌᓐᓂᖅ ᓇᓗᓇᐃᔭᐃᓂᒃᑯᑦ ᓄᑖᓂᒃ ᐅᖃᖃᑎᒌᒍᑎᑦᓴᓂᒃ.

ᑕᒪᑐᒪ ᐱᓕᕆᐊᑉ ᓯᕗᓪᓕᐊᒍᑦ, ᒥᓂᔅᑕ ᐸᓇᑦ ᑎᓕᓚᐅᕐᒫᖓ "ᐱᓕᕆᐊᖃᖅᐸᓪᓕᐊᓂᕐᒥ ᓄᑖᓂᒃ ᐅᖃᖃᑎᒌᒍᑎᑦᓴᑦᓯᐊᕙᓐᓂᒃ ᐊᑐᓕᖅᑕᐅᒍᒪᔪᓂ ᐅᑭᐅᖅᑕᖅᑐᒥ ᐱᕈᖅᐸᓪᓕᐊᑦᓯᐊᕐᓂᒃᑯᑦ". ᑭᖑᓂᐊᒍᑦ ᑕᒪᑐᒪ ᐅᓂᒃᑳᓕᐊᕆᔭᕐᒪ ᓇᓗᓇᐃᖅᓯᓯᒪᔪᖓ ᐱᓕᕆᐊᕆᔭᐅᓪᓚᕆᒍᓐᓇᖅᑐᓂᒃ ᒐᕙᒪᑦᓯᓐᓄᑦ ᑲᔪᓯᒃᑲᓐᓂᕆᐊᕈᑎᐅᒍᓐᓇᖅᑐᓂ ᓄᑖᓂᒃ ᐅᖃᐅᓯᑦᓴᓂᒃ ᐊᑐᖅᑕᐅᒍᒪᔪᓂ ᐅᑭᐅᖅᑕᖅᑐᒥ.

ᒥᓇᐅᒥᑦᓯᓂᖅ ᓯᕗᓂᑦᓴᒧᑦ ᐱᒋᐊᕈᑎᖃᖅᐸᑦᑐᖅ ᓴᙱᔪᓂᒃ ᖃᓄᐃᙱᓯᐊᖅᑐᓂᒃ ᐃᓄᓐᓂᒃ ᓄᓇᓕᓐᓂᓗ

ᓇᓗᓇᐃᕐᕕᒋᒍᒪᔭᒋᑦ ᑕᒪᓐᓇ ᒥᓇᐅᒥᑦᓯᓂᖅ ᓯᕗᓂᑦᓴᑎᓐᓄᑦ ᐅᖃᖃᑎᒋᓚᐅᖅᑕᒃᑲᓄᑦ ᐊᒥᓲᓂᖅᓴᓄᑦ ᐅᖃᖃᑎᒌᒍᑎᐅᖅᑳᕈᒪᙱᒋᐊᖓ. ᐃᓱᒫᓘᑎᐅᔪᑦ ᒥᓇᐅᒥᑦᓯᓂᕐᒨᖓᔪᓂᒃ ᓇᓗᓇᐃᔭᖅᑕᐅᑦᓯᐊᖅᓯᒪᒐᓗᐊᖅᑎᓪᓗᒋᑦ ᐅᑭᐅᖅᑕᖅᑐᓂ ᓄᓇᑖᕈᑎᓂ ᐊᖏᕈᑎᐅᓯᒪᔪᓂ, ᐅᑭᐅᖅᑕᖅᑐᒥᐅᑕᐃᑦ ᑭᒡᒐᖅᑐᐃᔨᖏᓪᓗ ᑎᒥᐅᔪᑦ ᒐᕙᒪᐅᔪᓪᓗ ᐱᓕᕆᐊᖃᕈᒪᓂᖅᓴᐅᒻᒪᑕ ᐃᓱᒫᓘᑎᐅᔪᓂᒃ ᖃᓄᐃᙱᓯᐊᕐᓂᕐᒨᖓᔪᓂᒃ ᖃᑕᙳᑎᒌᑦᑐᓄᑦ, ᓄᓇᓕᓐᓂᓗ ᐊᒻᒪᓗ ᐱᕙᓪᓕᐊᔪᓕᕆᕙᓪᓕᐊᓂᕐᒥ ᐱᕈᖅᐸᓪᓕᐊᒍᑎᐅᓗᑎᑦ ᑮᓇᐅᔭᓕᕆᓂᒃᑯᑦ.

ᑭᓯᐊᓂᓕ ᓱᓕᔪᒥᒃ ᐅᖃᕈᓐᓇᖅᑐᖓ ᐅᑭᐅᖅᑕᖅᑐᒧᑦ ᖃᓄᖅᑑᕈᑕᐅᓯᒪᔪᑦ ᖃᐅᔾᔨᑎᒋᓯᒪᔭᓕᒫᕋᓂ ᐊᑑᑎᓗᐊᖃᑦᑕᖅᓯᒪᙱᑦᑐᑦ ᐊᒡᕙᓘᓐᓃᑦ ᐊᔾᔨᒌᙱᓐᓂᖃᐃᓐᓇᐸᑦᑐᑦ ᐅᑭᐅᖅᑕᖅᑐᒥ ᑕᒪᒃᑐᐊ ᑲᓇᑕᒥᐅᑕᐃᑦ ᐊᒥᓲᓂᖅᓴᐃᑦ ᐊᑲᕐᕆᔮᕈᑎᒋᕙᑦᑕᖏᓐᓂ. ᑕᒪᒃᑯᐊ ᐊᑲᕐᕆᔮᕐᓂᕐᒧᑦ ᐊᔾᔨᒌᙱᓐᓂᓪᓛᓂᐅᔪᑦ ᐅᑭᐅᖅᑕᖅᑐᒥᐅᑕᓕᒫᓄᑦ ᐱᓕᕆᐊᕆᔭᐅᒍᒪᒻᒪᕆᓕᕐᒪᑕ ᑐᐊᕕᕐᓇᓂᖅᓴᐅᓗᑎᒃ. ᒪᒥᓴᖃᑎᒌᓐᓂᖅ ᐊᑕᓪᓚᕆᑦᑐᖅ ᑕᒪᑐᒧᖓ ᐃᓅᓯᕆᔭᐅᔪᓄᑦ. ᑖᓐᓇ ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑎᒌᓐᓂᕐᒧᑦ ᐊᑐᐊᒐᖅ, ᐃᒻᒥᒃᑰᖓᒍᓂ ᐊᑕᙱᓪᓗᓂ ᐊᑐᖅᑕᐅᒌᖃᑦᑕᖅᓯᒪᔪᓄᑦ ᑎᑎᕋᐅᑎᐅᖃᑦᑕᕇᖅᓯᒪᔪᓄᓪᓗ ᐅᑭᐅᖅᑕᖅᑑᑉ ᓯᕗᓂᑦᓴᖓᓄᑦ, ᐱᓕᕆᐊᕆᔭᐅᒋᐊᖃᕐᓂᐊᖅᑐᖅ ᑭᒃᑯᓕᒫᓄᑦ ᐱᔪᓐᓇᐅᑏᑦ ᐱᓇᐃᓗᑕᕆᕙᑦᑕᖓ.

ᑕᒪᑐᒪ ᐱᓕᕆᐊᑦᓴᐅᑉ ᓇᓗᓇᐃᕆᐊᒃᑲᓐᓂᖅᑕᐅᖃᑦᑕᓚᐅᖅᑐᖅ ᒪᒃᑯᑦᑐᓂᑦ ᑲᑎᖃᑦᑕᑎᓪᓗᖓ ᓯᑕᒪᐅᔪᓂᒃ ᐃᓕᓐᓂᐊᕕᓐᓂ ᐅᑭᐅᖅᑕᖅᑐᒥ ᐊᔾᔨᓕᐅᕈᑎᒃᑰᖓᔪᓂᒃ ᐅᖃᖃᑎᒌᒍᑎᓂ ᐊᑐᖅᓱᖓ. ᐱᓕᕆᒋᐊᒃᑲᓐᓂᕈᒪᒍᑎᒋᖃᑦᑕᓚᐅᖅᑕᒃᑲ ᐅᖃᖃᑎᒌᒍᓐᓇᕐᓂᖏᑦ ᐱᓕᕆᐊᖃᓪᓚᕆᒍᒪᓂᖏᓪᓗ ᐃᓱᒫᓘᑎᐅᕙᑦᑐᓂᒃ ᐆᑦᑑᑎᒋᓗᒍ ᓂᕆᔭᑦᓴᖃᑦᓯᐊᖃᑦᑕᖏᓐᓂᖅ, ᐊᕙᑎᒥᒃ ᑲᒪᑦᓯᐊᕆᐊᖃᕐᓂᖅ, ᐃᓅᓯᕐᒥᓂ ᑭᐱᓯᕙᑦᑐᓂ ᓄᖅᑲᑎᑦᓯᒐᓱᐊᕐᓂᖅ, ᐃᓕᓐᓂᐊᕐᓂᖅ, ᐅᖃᐅᓯᓕᕆᓂᖅ ᐃᓕᖅᑯᓯᑐᖃᐃᓪᓗ ᐱᐅᓕᔭᐅᒋᐊᒃᑲᓐᓂᕆᐊᖃᕐᓂᖏᑦ, ᐃᓪᓗᓕᕆᓂᖅ ᐊᒻᒪᓗ ᖁᐊᖅᓵᓇᙱᒻᒪᕆᑦᑐᖅ ᖃᕆᑕᐅᔭᓕᕆᒍᑏᑦ ᐊᔾᔨᒌᔾᔫᒥᒋᐊᖃᕐᓂᖓ. ᓯᕗᓂᑦᓴᑎᓐᓄᑦ ᒥᓇᐅᒥᑦᓯᓂᕐᒧᑦ ᑕᑯᓐᓇᖅᑕᐅᔪᓪᓕ ᖃᓄᐃᙱᓯᐊᕐᓂᒃᑯᑦ ᐱᕈᖅᐸᓪᓕᐊᓂᒃᑯᓪᓗ ᓄᓇᖅᑲᑎᒌᑦᑐᓄᑦ, ᓴᐳᑎᔭᐅᒋᐊᖃᕐᓂᖓ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᑦ, ᐊᒻᒪᓗ ᓂᕐᔪᑎᖃᑦᓯᐊᕆᐊᖃᕐᓂᖅ ᑭᖑᕚᕆᔭᐅᔪᓄᑦ ᐊᑐᖅᑕᐅᑦᓯᐊᕈᓐᓇᕐᓗᑎᑦ.

ᓇᓗᓇᐃᒃᑲᓐᓂᕆᐊᖃᖅᑐᖓ ᑕᒪᒃᑯᐊ ᒫᓐᓇᒃᑯᑦ ᐅᖃᐅᓯᐅᕙᓪᓕᐊᖏᓐᓇᕐᒪᑕ ᑭᒃᑯᓕᒫᓄᑦ ᐊᑕᖏᖅᓱᖑ ᐃᓄᐃᑦ ᓄᓇᖓᑦ. ᓯᕗᓕᖅᑏᑦ, ᖃᑕᙳᑎᒌᑦᑐᑦ, ᒪᒃᑯᑦᑐᑦ, ᐃᓐᓇᑐᖃᐃᑦ ᐊᓯᖏᓪᓗ ᓄᓇᖅᑲᑎᒌᑦᑐᑦ ᐅᖃᐅᓯᖃᑦᓯᐊᖏᓐᓇᐸᑦᑐᑦ ᐱᓕᕆᐊᖃᕈᒪᑦᓯᐊᓂᒃᑯᑦ ᐊᒻᒪᓗ ᐊᔪᐃᓐᓇᖅᓂᖃᖅᐸᑦᓱᑎᒃ.

ᓲᕐᓗ, ᐅᖃᖃᑎᒌᒍᑎᓐᓂ ᓄᓇᑦᓯᐊᕗᑦ ᒐᕙᒪᒃᑯᖏᓐᓂ ᐅᖃᐅᓯᐅᖏᓐᓇᓚᐅᖅᑐᖅ ᓯᒥᑦᑐᐃᕙᓪᓕᐊᓂᖅ ᑰᒻᒥ ᐃᓱᒫᓘᑎᐅᓗᐊᓚᐅᖅᑐᖅ ᑲᑎᒪᔨᐅᔪᓄᑦ. ᓇᓗᓇᙱᑦᑐᖅ ᖃᐅᒻᒪᖅᑯᓯᕆᓂᕐᒧᑦ ᐱᓕᕆᐊᖑᔪᑦ ᐊᒻᒪᓗ ᖃᓄᐃᙱᑦᓯᐊᕆᐊᖃᕐᓂᖏᑦ ᓄᓇᖃᖅᑐᑦ ᒥᑦᓯᖃᙱᒋᐊᖓ ᐊᑐᖅᑕᐅᓚᖓᑎᓪᓗᒍ. ᓄᓇᖃᖅᑎᒃᑲ, ᓄᓇᕕᒻᒥ, ᔭᐃᒻᔅ ᕙᐃ ᒥᑦᓯᖓᓃᑦᑐᑦ, ᑎᒥᖏᑎᒍᑦ ᐃᓱᒪᖏᑎᒍᓪᓗ ᐊᑐᖅᑕᐅᓯᒪᓂᖏᑦ ᓱᕈᕐᓇᖅᑐᓄᑦ ᓇᓗᓇᐃᔭᖅᑕᐅᓯᒪᑦᓯᐊᖅᑐᑦ. ᑕᒪᑐᒪ ᐊᕙᑎᐅᑉ ᐃᓗᐊᓂ, ᐱᔭᕆᐊᑐᓂᐅᓴᔪᖅ ᑎᓕᐅᕆᒋᐊᒃᑲᓐᓂᕐᓂᖅ ᓯᕗᓕᖅᑎᐅᔪᓂᒃ ᐃᓱᒪᒋᔭᖃᑦᓯᐊᖁᓪᓗᒋᑦ ᓯᕗᓂᑦᓴᒧᑦ ᒥᓇᐅᒥᑦᓯᓂᕐᒧᑦ ᐊᑐᖅᑕᐅᒍᒪᔪᓂ.

ᑎᓕᔭᐅᒍᑎᒋᓯᒪᔭᕋ ᑎᑎᖅᑲᖅ, ᕿᒥᕐᕈᒋᐊᒃᑲᓐᓂᕐᓂᐊᖅᑐᖓ ᐱᓇᐃᓗᑕᐅᕙᑦᑐᓂ ᐃᓅᓯᓕᕆᓂᕐᒧᑦ, ᑮᓇᐅᔭᓕᕆᓂᕐᒧᑦ, ᐊᕙᑎᓕᕆᓂᕐᒧᓪᓗ ᑐᖏᓕᐊᓂ ᐱᓕᕆᐊᒻᒪ, ᑭᓯᐊᓂᑦᑕᐅᖅ ᐱᒻᒪᕆᐅᔪᖅ ᖃᐅᔨᒪᔭᐅᓂᖓ ᓯᕗᓂᐊᒍᑦ ᐃᓱᒫᓘᑎᐅᓗᐊᖅᑐᓪᓕ ᐃᓕᓐᓂᐊᖅᑐᓕᕆᓂᖅ, ᐃᓱᒪᒃᑯᑦ ᐋᓐᓂᐊᖃᕐᓇᖏᑦᑐᓕᕆᓂᖅ, ᓱᓇᒃᑯᑖᓂᒃ ᐊᑲᕐᕆᔮᕈᑎᖃᒋᓗᐊᕐᓂᖅ, ᓂᕆᔭᑦᓴᖃᙱᓗᐊᖃᑦᑕᕐᓂᖅ, ᐊᒻᒪᓗ ᐱᒻᒪᕆᐅᓂᖓ ᓄᓇᑖᕈᑎᓄᑦ ᐊᖏᕈᑎᐅᓯᒪᔪᑦ ᐊᑐᓕᖅᑎᑕᐅᑦᓯᐊᕆᐊᖃᕐᓂᖏᑦ, ᑕᒪᒃᑯᐊ ᐅᑭᐅᖅᑕᖅᑐᒥᐅᓄᑦ ᐱᒻᒪᕆᒋᔭᐅᔪᑦ ᐱᓕᕆᐊᖑᒋᐊᖃᕐᓂᖏᓐᓄᑦ. ᐊᓯᖏᓪᓕ ᐃᓱᒫᓘᑎᐅᕙᑦᑐᑦ ᐃᓱᒫᓘᑎᐅᕙᒃᑲᓗᐊᕐᒥᔪᑦ ᐅᑭᐅᖅᑕᖅᑐᒥᐅᓄᑦ. ᐅᓇ ᐅᖃᐅᓯᐅᓚᐅᖅᑐᖅ ᐅᑕᐅᓯᖅ ᐅᕙᓐᓄᑦ ᐊᑦᑐᐊᓂᖃᓗᐊᓚᐅᖅᑐᖅ ᐅᖃᐅᑎᔭᐅᒐᒪ ᓯᕗᓕᖅᑎᒧᑦ "ᒥᓇᐅᒥᑦᓯᒐᓱᐊᕐᓂᖅ ᓯᕗᓂᑦᓴᒧᑦ ᐊᓐᓇᐅᒪᒍᓐᓇᖏᑦᑐᖅ ᐊᕙᓗᔪᐅᒪᒍᓂ ᐊᔪᖅᓴᓂᕐᒧᑦ".

ᒥᓇᐅᒥᑦᓯᒐᓱᐊᕐᓂᕐᒧᑦ ᑎᑎᕋᐅᑎᐅᓯᒪᔪᑦ ᐅᑭᐅᖅᑕᖅᑐᒥ

ᐅᖃᖃᑎᒌᑉᐸᓪᓕᐊᑎᓪᓗᑕ ᓄᑖᓂᒃ ᒥᓇᐅᒥᑦᓯᒐᓱᐊᕈᑎᓂᒃ ᐊᑐᖅᑕᐅᒍᒪᔪᓂᒃ, ᓄᓇᙳᐊᓂᒃ ᐊᑐᐃᓐᓇᕈᐃᔪᖃᓚᐅᖅᑐᖅ ᐱᔾᔪᑎᖃᖅᑐᓂᒃ ᓴᐳᑎᔭᐅᓯᒪᔪᓂ ᓄᓇᓂᒃ ᐅᑭᐅᖅᑕᖅᑐᒥ. ᑖᓐᓇ ᐃᑲᔪᕐᓂᖃᓚᐅᖅᑐᖅ ᓇᓗᓇᐃᔭᐃᒍᑎᒋᒃᑲᓐᓂᖅᑐᒍ ᓱᑯᑦᓯᖏᑦ ᓯᕗᓂᑦᓴᑎᓐᓂ ᒥᓇᐅᒥᑦᓯᒐᓱᐊᕐᓂᕐᒧᑦ ᐱᓕᕆᕕᐅᒋᐊᒃᑲᓐᓂᕈᓐᓇᕐᒪᖔᑕ. ᑕᒪᓐᓇ ᐊᑐᖅᑕᐅᑎᓪᓗᒍ, ᓇᓗᓇᙱᒋᐊᒃᑲᓐᓂᖅᑐᖅ ᓄᓇᒦᑦᑐᓄᑦ ᑐᕌᖓᔪᑦ ᒥᓇᐅᒥᑦᓯᒋᐊᕈᑏᑦ ᐅᑭᐅᖅᑕᖅᑐᒥ ᐆᑦᑑᑎᒋᓗᒋᑦ ᒥᕐᖑᐃᓯᕐᕕᓐᓂ ᓴᖅᑭᑦᑎᕆᓂᖅ, ᐆᒪᔪᖃᖅᑐᓂ ᓴᐳᑎᔭᐅᒪᔪᓂ, ᑕᒪᒃᑯᐊ ᓴᐳᑎᔭᐅᓯᒪᓂᖅᓴᐅᓪᓗᑎᒃ ᒪᓕᒐᖅᑎᒍᑦ ᓄᓇᑖᕈᑎᓄᑦ ᐊᖏᖃᑎᒌᒍᑎᓂᒃ ᐊᑐᕐᓂᒃᑯᑦ, ᑕᒪᓐᓇ ᓴᖅᑮᓯᒪᔪᖅ ᖄᖓᒍᑦ ᑲᓇᑕᓕᒫᒥ ᐊᑐᐊᒐᕐᓂᒃ ᐊᑐᕇᕐᓂᖏᓐᓂ. ᐅᖃᐅᓯᐅᖃᑦᑕᓗᐊᓚᐅᕐᒥᔪᖅ ᓄᓇᓕᕐᔪᐊᓂ ᐊᕕᑦᑐᖅᓯᒪᔪᓂ ᒐᕙᒪᒃᑯᑦ ᑭᒡᒐᖅᑐᐃᔨᖏᓐᓄᑦ ᐱᔪᓐᓇᐅᑎᓂᒃ ᑎᒍᓯᕙᓪᓕᐊᒍᒪᓕᕆᐊᖏᑦ ᓇᒻᒥᓂᕐᓱᓂᕐᒧᑦ ᐅᖃᖃᑎᖃᕆᐊᒃᑲᓐᓂᓚᐅᖅᑎᓐᓇᒋᑦ ᓄᓇᒦᑦᑐᓂᒃ ᒥᓇᐅᒥᑦᓯᓕᕆᓂᕐᒨᖓᔪᓂᒃ, ᑕᐃᒪᐃᑦᑎᓪᓗᒍ ᐃᓚᖏᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᓂ ᑭᒡᒐᖅᑐᐃᔪᑦ ᑐᑦᓯᕋᖅᑐᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐊᖏᖃᑎᒌᒍᑏᑦ ᑲᔪᓯᑎᑕᐅᑦᓯᐊᕐᓗᑎᑦ ᐱᓕᕆᐊᑦᓴᐅᔪᑦ ᐃᑲᔫᑎᑦᓴᐃᓪᓗ ᑲᒪᒋᔭᐅᑦᓯᐊᕐᓗᑎᑦ ᑲᑎᖅᓱᐃᒍᑎᒋᑦᓯᐊᕐᓗᒋᑦ ᐊᐅᓚᑦᓯᓃᑦ ᖃᐅᔨᓴᕐᓂᕐᓗ, ᐃᓕᓐᓂᐊᕈᑎᑦᓴᐃᑦ, ᐃᖅᑲᓇᐃᔮᑦᓴᐃᑦ, ᐱᔨᑦᓯᕋᐅᑏᑦ, ᐊᒻᒪᓗ ᓇᒻᒥᓂᖃᕐᓂᕐᒧᑦ ᐊᑐᐃᓐᓇᐅᑎᑕᐅᔪᑦ.

ᐃᒪᕐᒥᐅᑕᓂᒃ ᒥᓇᐅᒥᑦᓯᓂᕐᒧᑦ ᐱᓇᓱᐊᕋᑦᓴᐅᔪᑦ

ᐃᒪᕐᒥᐅᑕᓂᒃ ᒥᓇᐅᒥᑦᓯᒐᓱᐊᕈᑏᑦ ᐅᑭᐅᖅᑕᖅᑐᒥ, ᐊᔾᔨᒋᙱᑕᖓᓕ, ᓇᓕᒧᒋᙱᑕᖓ ᓄᓇᒦᑦᑐᓂᒃ ᒥᓇᐅᒥᑦᓯᒐᓱᐊᕈᑎᓂᒃ. ᐃᓄᐃᑦ, ᐆᑦᑑᑎᒋᓗᒍ, ᓇᓗᓇᐃᖅᓯᓯᒪᔪᑦ, ᓇᒻᒥᓂᖅ ᐸᕐᓇᓯᒪᐅᑎᓕᕆᕐᓂᒥᒍᑦ 20%-ᓗᐊᒐᓚᐅᔪᑦ ᐃᒪᕐᒥᐅᑕᓄᑦ ᓇᔪᒐᐅᔪᑦ "ᐱᒻᒪᕆᐅᓂᖏᓂ ᓱᑯᑦᓯᖏᑦ" ᐃᓱᒪᒋᔭᕐᒥᒍᑦ. ᒐᕙᒪᐃᑦ, ᐊᑐᖅᓱᑎᒃ ᐸᕐᓇᓯᒪᐅᑎᓂᒃ ᓇᓗᓇᐃᖅᓯᓯᒪᔪᑦ 55% ᐃᒪᒥᐅᑕᐃᑦ ᓇᔪᖅᐸᑦᑕᖏᑦ ᐱᒻᒪᕆᐅᒋᐊᖏᑦ, 12% ᐊᑦᑐᐊᖃᑎᒌᓐᓂᖃᖅᑐᑦ ᐃᓄᐃᑦ ᓇᓗᓇᐃᖅᓯᒪᔭᖏᓐᓂ. ᑕᐃᒪᐃᒐᓗᐊᖅᑎᓪᓗᒍ, ᐃᓄᐃᓴᓐᓂᖅᓴᐅᔪᖅ 1%-ᒥ ᐃᒪᕐᒥᐅᑕᓄᑦ ᓇᔪᒐᐅᔪᑦ ᒪᓕᒐᖅᑎᒍᑦ ᓴᐳᑎᔭᐅᓯᒪᒋᐊᖓ.

ᐅᖃᖃᑎᒌᑉᐸᓪᓕᐊᒋᓐᓇᖅᑐᑦ ᐱᔾᔪᑎᒋᓗᒍ ᐃᒪᕐᓯᐅᑕᐃᑦ ᓴᐳᑎᔭᐅᒋᐊᖃᕐᓂᖓ ᐅᑭᐅᖅᑕᖅᑐᒥ. ᐆᑦᑑᑎᒋᓗᒍ, ᑖᓐᓇ ᐱᑭᐊᓚᓱᕐᓱᐊᖅ ᑲᒥᓴᓐ (ᖁᑦᓯᑦᑐᓂ ᐃᒪᕕᒃ) ᐊᑐᐃᓐᓇᐅᕙᓗᑦᑐᖅ ᐃᒪᕐᒥᐅᑕᓂᕐ ᒥᓇᐅᒥᑦᓯᒐᓱᐊᕈᑎᓂ ᐱᓕᐱᐊᖑᓪᓗᓂ ᐊᑯᓐᓂᐊᓂ ᐊᑯᑭᑦᑐᐃᑦ ᐊᒻᒪᓗ ᑲᓇᑕ. ᓄᓇᑦᓯᐊᕗᑦ ᒐᕙᒪᒃᑯᖏᑦ ᑐᐊᕕᐊᕆᔭᒥᓂ ᐱᓕᕆᐸᓪᓕᐊᔪᑦ ᒥᓇᐅᒥᑦᓂᓯᒐᓱᕈᑎᓂ ᐃᒪᖁᑎᒥᒍᑦ. ᑭᖑᓪᓕᖅᐸᐅᓪᓗᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᕆᐊᒃᑲᓐᓂᖅᓯᒪᒻᒥᔪᑦ ᐱᒻᒪᕆᐅᒋᐊᖓ ᑕᓪᓗᕈᑎᐅᑉ ᐃᒪᖁᑎᖓ ᓴᐳᑎᔭᐅᓂᕐᒧᑦ ᐱᓕᕆᐊᖑᓂᖓ ᐱᔭᕇᖅᑕᐅᒋᐊᖃᓕᕆᐊᖓᓂᒃ ᓴᐳᑎᔭᐅᓕᕐᓄᓂ.

ᐅᓇ ᐊᑕᐅᓯᖅ ᓇᓗᓇᙱᑦᑐᖅ. ᐃᑎᔪᒥᕐ ᖃᐅᔨᒪᓂᖃᑦᓯᐊᖅᑐᑦ, ᖃᐅᔨᓴᖅᑐᓕᕆᓂᒃᑯᑦ ᐊᒻᒪᓗ ᖃᐅᔨᒪᔭᑐᖃᐅᔪᑦ ᐅᑭᐅᖅᑕᖅᑐᒥᐅᓄᑦ ᑕᒪᒃᑯᐊ ᐊᑐᖅᑕᐅᑦᓯᐊᑐᐊᕈᑎᑦ ᓯᕗᒧᐊᒋᐊᕈᑕᐅᒍᓐᓇᖅᑐᑦ ᒪᓕᒐᓕᕆᓂᒃᑯᑦ ᐊᑐᐊᒐᓕᕆᓂᒃᑯᓪᓗ. ᐱᑕᖃᓪᓚᕆᑉᐸᓪᓕᐊᓕᕐᒥᔪᖅ ᓯᓚᑐᔪᓂᒃ ᐃᓱᒪᒋᔭᖃᑦᓯᐊᖅᑐᓂᒃ ᐱᓕᕆᐊᖃᕈᓐᓇᖅᑐᓂᓗ ᓴᐳᔾᔨᓂᒃᑯᑦ ᐊᕙᑎᐅᑉ ᖃᓄᐃᙱᓯᐊᕐᓂᖓᓄᑦ, ᐊᓐᓇᐅᒪᒍᓐᓇᕐᓂᖓᓄᒃ, ᐊᒻᒪᓗ ᐅᑭᐅᖅᑕᖅᑐᓂ ᓄᓇᓕᐅᔪᑦ ᐊᓯᔾᔨᐸᓪᓕᐊᒍᑕᐅᔪᓂ ᐊᑐᕈᓐᓇᓯᐊᕐᓂᑯᑦ.

ᓯᓚᑐᓂᒃᑯᑦ ᓄᑖᓂᒃ ᐃᓱᒻᒪᓯᖅᑖᕐᓂᖅ ᒥᓇᐅᒥᑦᓯᓂᕐᒨᖓᔪᓂᒃ

ᐸᕐᓇᐸᓪᓕᐊᓂᒃᑯᑦ ᐅᖃᖃᑎᒌᑦᑎᓪᓗᑕ, ᑐᓴᓚᐅᖅᑐᒍᑦ ᒥᓇᐅᒥᑦᓯᒐᓱᐊᕐᓂᕐᒧᑦ ᐃᓱᒪᒋᔭᐅᓯᒪᒻᒪᕆᑦᑐᓂᒃ ᐱᓕᐊᖑᔪᓂᒃ, ᐊᑐᐊᒐᒃᓂᒃ, ᐊᒻᒪᓗ ᒪᓕᒐᖅᑎᒍᑦ ᐊᑐᖅᑕᐅᒍᓐᓇᖅᑐᓂᒃ ᓴᙱᓂᖅᓴᒃᑯᑦ ᓴᐳᔾᔨᒍᓐᓇᖁᓪᓗᒋᑦ ᓇᓗᓇᐃᖅᑕᐅᒪᔪᓂ ᓄᓇᓂ ᐱᔾᔪᑎᖃᕐᓗᑎᒃ ᓄᓇᓖᑦ ᐱᕈᖅᐸᓪᓕᐊᑦᓯᐊᕈᓐᓇᕐᓂᖏᓐᓄᑦ. ᖃᐅᔨᓴᕐᓂᖃᖅᑎᓪᓗᑕ ᑎᓕᔭᐅᓯᒪᓂᒃᑯᑦ ᑕᒪᑐᒪ ᐱᓕᕆᐊᑦᑕ, ᐃᓚᖓᑦ ᕿᒥᕐᕈᔭᐅᒋᐊᒃᑲᓐᓂᓚᐅᖅᑐᖅ - ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᒪᔪᑦ ᓄᓇᐃᑦ. ᑖᓐᓇ ᐃᓱᒪᒋᔭᐅᓯᒪᔪᖅ ᓄᓇ ᓴᐳᔾᔭᐅᓯᒪᔪᖅ ᑐᕌᖓᓪᓗᓂ ᐃᑲᔪᖅᓯᒍᑎᑦᓴᓄᑦ ᓄᓇᖃᖅᑳᖅᓯᒪᔪᑦ ᐱᓇᓱᐊᕈᒪᔭᖏᓐᓄᑦ. ᑕᒪᓐᓇ ᑲᔪᓯᑎᑕᐅᒍᓐᓇᕈᑎ ᑎᒍᓯᔾᔪᑕᐅᒍᓐᓇᖅᑐᖅ "ᒥᓇᐅᒥᑦᓯᒐᓱᐊᕐᓂᒃᑯᑦ ᑮᓇᐅᔭᓕᕆᓂᕐᒥ" ᑕᒪᒃᑯᐊ ᓄᓇᒦᙶᖅᑐᑦ ᐃᓄᓐᓅᖓᔪᓪᓗ ᐱᕈᖅᐸᓪᓕᐊᑎᑕᐅᒍᓐᓇᕐᓗᑎᑦ ᓄᖑᓴᖅᑕᐅᙱᖔᕐᓗᑎᒃ. ᑕᒪᓐᓇ ᐃᑲᔪᖅᓯᒐᔭᖅᑐᖅ ᓄᓇᓕᓐᓂᒃ ᐃᓄᓐᓂᓗ ᐅᑎᖅᑎᑦᓰᓕᕐᓗᑎᒃ ᓄᓇᒥ ᖃᐅᔨᒪᔭᑐᖃᐅᔪᓂᒃ ᐊᓐᓇᐅᒪᒍᑎᓂᒃ, ᐊᑐᒃᑲᓐᓂᓕᕐᓗᑎᒃ ᐃᓕᖅᑯᓯᑐᖃᕐᒥᓂᑦ, ᐃᓕᑉᐸᓪᓕᐊᓕᕐᓗᑎᓪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᓐᓂᒃ, ᖃᐅᔨᒪᑦᓯᐊᓕᕐᓗᑎᓗ 'ᓄᓇᐃᑦ ᓱᑯᑦᓯᖏᑦ ᐱᒌᓐᓇᕐᓂᐊᖅᑕᖏᑦ'.

ᒪᑯᐊ ᐃᓚᖏᑦ ᐆᑦᑑᑎᑦᓴᐅᔪᑦ ᐱᓕᕆᐊᑦᓴᓄᑦ ᑐᕌᖓᔪᑦ ᐃᑲᔪᖅᓯᓂᒃᑯᑦ ᒥᓇᐅᒥᑦᓯᒐᓱᐊᕐᓂᒃᑯᑦ ᑮᓇᐅᔭᓕᐅᕈᑕᐅᒍᓐᓇᖅᑐᑦ ᒪᑯᐊ ᐃᓚᐅᑎᓪᓗᒋᑦ:

  1. ᒍᐊᐄ ᕼᐋᓇᔅ ᒥᕐᖑᐃᓯᕐᕕᑦᓴᖅ,
  2. ᒍᐊᐄ ᕼᐋᓇᔅ ᓄᓇᓕᕐᔪᐊᖓᓐᓂ ᐃᒪᕐᒥᐅᑕᓄᑦ ᒥᕐᖑᐃᓯᕐᕕᑦᓴᐃᑦ,
  3. ᐋᔅᑐᐃᓕᐊᒥᐅᑦ ᐱᓕᕆᓂᖓᑦ ᓄᓇᖃᖅᑳᖅᓯᒪᔪᑦ ᓄᓇᒥᒃ ᐃᓕᓐᓂᐊᕋᑦᓴᒥᒃ,
  4. ᓄᓇᖃᖅᑳᖅᓯᒪᔪᑦ ᓯᕗᓕᖅᑎᐅᓂᕐᒧᑦ ᐱᒋᐊᖅᑎᑕᐅᓯᒪᔪᖅ ᐱᓕᕆᐊᖑᖁᓪᓗᒍ ᓄᓇᓕᕐᔪᐊᒥᐅᑕᐅᖃᑎᒌᑦᑐᑦ ᓄᓇᖃᖅᑳᖅᓯᒪᔪᑦ ᐸᖅᑭᑦᓯᓂᕐᒧᑦ ᐱᓕᕆᐊᖅ ᐅᒻᒪᓗ
  5. ᒪᑭᑎᑕᐅᒃᑲᓐᓂᖅᓯᒪᔪᖅ ᒪᓕᒐᖅᑎᒍᑦ ᑎ ᐅᕆᔨᕋ ᒥᕐᖑᐃᓯᕐᕕᒃ ᓂᐅ ᔩᓚᓐ-ᒥ.

ᑐᑭᓯᒋᐊᕈᑎ ᐅᓂᒃᑳᓕᐊᖑᓯᒪᔪᖅ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒋᐊᖃᖅᑐᑦ ᓄᓇᐃᑦ ᕿᒥᕐᕈᓂᖃᖅᑐᖅ ᐱᒻᒪᕆᐅᓂᖓᓂᒃ ᑲᓇᑕ ᓯᕗᓪᓕᖅᐸᐅᓪᓗᓂ ᓄᓇᕐᔪᐊᓕᒫᒥ ᒪᓕᒐᖅᑎᒍᑦ ᐊᑐᕈᓐᓇᖅᑐᓂ ᐃᓕᑕᕆᔭᐅᓕᕐᓗᑎᒃ ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᒪᔪᑦ ᓄᓇᐃᑦ. ᐃᓱᒪᒋᔭᖃᖅᑯᖓᓕ ᐃᓕᑕᕐᓇᑦᓯᐊᖅᑐᒥ ᐱᕈᖅᐸᓪᓕᐊᓂᖃᕐᒪᑦ ᓇᓪᓕᐊᑐᐃᓐᓇᖅ ᓈᒻᒪᑦᓯᑉᐸᑦ ᓯᕗᓕᖅᑎᐅᔪᖅ ᐅᖃᖃᑎᒌᓐᓂᕐᒥᑦ ᓴᕿᑎᑦᓯᓂᐊᕆᐊᖓ ᐅᑭᐅᖅᑕᖅᑐᒥ.

ᐊᑐᖅᑕᐅᕙᓪᓕᐊᔪᑦ ᐊᑐᓕᖅᑎᑕᐅᓂᖓᓂ ᒥᓇᐅᒥᑦᓯᒐᓱᐊᕐᓂᕐᒧᑦ ᐊᑐᓕᖁᔭᐅᔪᓂ

ᓯᓚᐃᑦᑑᒐᔭᖅᑐᖓ ᓇᓗᓇᐃᕐᕕᒋᓐᓂᖏᒃᑯᒃᑭᑦ ᐱᓇᓱᐊᒐᐅᓯᒪᔪᑦ ᒥᕐᖑᐃᓯᕐᕕᓕᕆᓂᒃᑯᑦ ᐅᑭᐅᖅᑕᖅᑐᒥ ᐊᔾᔨᒌᙱᑦᑐᓂᒃ ᐱᔾᔪᑎᖃᖅᓯᒪᓕᕐᒪᑕ ᐸᕐᓇᓯᒪᑦᓯᐊᙱᓐᓂᕐᒧᑦ ᐃᑲᔫᑎᑦᓴᓄᓪᓗ ᑐᕌᖓᔪᑦ ᐋᖅᑭᓱᖅᑕᐅᑦᓯᐊᖅᓯᒪᙱᒧᓗ. ᓇᓗᓇᐃᔭᖅᑕᐅᓯᒪᑦᓯᐊᐸᙱᑦᑐᖅ ᐃᑲᔫᑎᑦᓴᓄᑦ ᐊᖏᖃᑎᒌᒍᑏᑦ ᑐᕌᖓᑎᓪᓗᒋᑦ ᒥᓇᐅᒥᑦᓯᒐᓱᐊᕐᓂᒧᑦ ᐱᓇᓱᐊᖅᑕᐅᔪᓄᑦ ᐃᑲᔪᖅᓯᓯᒪᒻᒪᖔᑕ ᓄᓇᓕᓐᓂ ᖃᓂᒋᔭᖏᓐᓂ ᐱᓇᓱᐊᕐᕕᐅᔫᑉ. ᐆᑦᑑᑎᑦᓴᐅᒍᓐᓇᖅᑐᑦ ᐅᕙᓐᓄᑦ ᑐᓐᔭᐅᖃᑦᑕᓚᐅᖅᑐᑦ, ᐆᑦᑑᑎᒋᓗᒍ ᖃᐃᕙᓪᓕᐊᔪᖅ ᐃᒪᕐᒥᐅᑕᓂᒃ ᒥᕐᖑᐃᓯᕐᕕᓕᐅᕐᓂᖅ ᑖᓐᓕ ᑲᖏᐊᓂ, ᐊᖑᓂᐊᖅᕕᐊ ᓂᕿᕿᖅᔪᐊᒻ, ᓄᓇᑦᓯᐊᖅ, ᑕᐃᑲᓂ ᐊᖏᖃᑎᒌᒍᑏᑦ ᐱᑕᖃᙱᓪᓚᕆᑦᑐᑦ. ᐃᓱᒫᓘᑎᐅᕙᑦᑐᑦ ᐃᑲᔫᑎᑦᓴᖃᓕᕋᐃᒻᒪᑦ ᐊᖏᖃᑎᒌᒍᑎᑎᒍᑦ ᓄᓇᓕᓐᓄᑦ ᑐᕌᖓᔪᑦ ᓇᓗᓇᐃᔭᖅᑕᐅᓯᒪᑦᓯᐊᙱᑐᐊᕈᑎᑦ ᐊᐳᖅᑕᕈᑎᖃᕈᓐᓇᕐᒪᑕ ᒪᑭᑕᒐᓱᐊᑦᓯᐊᓂᒃᑯᑦ ᑮᓇᐅᔭᓕᕆᓂᒃᑯᑦ ᐅᑭᐅᖅᑕᖅᑐᒥ. ᑕᒪᓐᓇ ᐱᓇᐃᓗᑦᓯᕆᐊᓪᓚᑦᓯᒪᔪᖅ ᐅᐱᓐᓇᕋᓂ ᐃᒪᕐᒥᐅᑕᓕᕆᔨᒃᑯᑦ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ, ᑲᓇᑕᒥ ᓂᕐᔪᑎᓄᑦ ᐱᓕᕆᔾᔪᑎᖃᖅᑐᑦ, ᐊᒻᒪᓗ ᐊᕙᑎᓕᕆᔨᕐᔪᐊᒃᑯᑦ ᑲᓇᑕᒥ ᓯᓚᐅᓪᓗ ᐊᓯᔾᔨᐸᓪᓕᐊᓂᖓᓄᑦ ᐱᓕᕆᕕᐅᔪᑦ ᑖᑦᓱᒥᖓᑦᓴᐃᓐᓇᖅ ᐊᑐᐊᒐᖃᙱᒻᒪᑕ ᒐᕙᒪᖏᑦᑎᒍᑦ ᒥᓇᐅᒥᑦᓯᒐᓱᐊᕐᓂᕐᒧᖅ ᐃᑲᔫᑎᑦᓴᓂᒃ ᐱᓕᕆᓂᖏᑎᒍᑦ ᐊᖏᖃᑎᒌᓐᓂᖏᑦᑎᒍᓪᓗ.

ᐊᑐᓕᕈᔭᐅᓯᒪᔪᑦ ᓄᑖᓂᒃ ᐅᖃᖃᑎᒌᒍᑎᓂ ᓴᖅᑭᑎᑦᓯᓂᕐᒧᑦ ᒥᓇᐅᒥᑦᓯᒐᓱᐊᕐᓂᒥ

ᐱᓇᓱᐊᒐᕆᓯᒪᔭᒃᑯᑦ ᐅᓪᓗᒥᒧᑦ, ᓇᓗᓇᐃᖅᓯᒍᑎᒋᓂᐊᖅᑕᓐᓄᑦ ᓇᑦᓴᕐᓂᐊᕐᒥᔪᖓ ᐊᑐᓕᕈᔨᒍᑎᓂ ᐱᔾᔪᑎᖃᖅᑐᓂ ᐅᖃᖃᑎᒌᒍᑎᐅᓯᒪᔪᓂ ᑎᑭᓪᓗᒍ ᒫᑦᓯ 31, 2017, ᐊᑲᖅᓴᖅᑐᖓ ᓇᓗᓇᐃᖅᓯᒍᓐᓇᕆᐊᖅ ᐱᖓᓲᓕᖅᑲᖓᔪᓂᒃ ᐱᓕᕆᐊᕆᔭᐅᒋᐊᖃᓪᓚᕆᑦᑐᓂ ᐃᑲᔪᖅᓯᒍᑎᑦᓴᓂᒃ ᑖᒃᑯᓂᖓ ᓄᑖᓂᒃ ᐅᑭᐅᖅᑕᖅᑐᒥ ᒥᓇᐅᒥᑦᓯᒐᓱᐊᕐᓂᕐᒧᑦ ᐱᓇᓱᐊᒐᐅᔪᒥ.

  1. ᒐᕙᒪᒃᑯᒋᑦ ᑲᓇᑕᐅᑉ ᓯᕗᒧᐊᒋᐊᖃᖅᑐᑦ ᐸᕐᓇᐸᓪᓕᐊᖃᑎᖃᕐᓗᑎᒃ ᓄᓇᑖᕈᑎᖃᕐᓂᕐᒧᑦ ᑲᑐᔾᔨᖃᑎᒌᑦᑐᓂ ᓇᓗᓇᐃᔭᐃᓂᕐᒧᑦ ᐃᒪᕐᒥᐅᑕᑦ ᓇᓪᓕᖏᑦ ᒥᓇᐅᒥᔭᐅᒋᐊᖃᕐᒪᖔᑕ.
    1. ᒐᕙᒪᒃᑯᑦ ᐊᑐᕐᓂᐊᕐᓂᕋᖅᓯᒪᓂᖓ ᓴᐳᔾᔨᓂᕐᒥ 10%-ᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐃᒪᖁᑎᖏᓐᓂᒃ ᐊᕐᕌᒍᖅ 2020 ᑎᑭᓪᓗᒍ ᑕᒪᓐᓇ ᒫᓐᓇᒧᑦ ᐱᔭᕆᐊᑐᔪᕐᔫᔮᖅᑑᒐᓗᐊᖅ ᑭᓯᐊᓂ ᑎᑭᐅᑎᔭᑦᓴᐅᔪᖅ ᒐᕙᒪᑐᖃᒃᑯᑦ ᑎᒥᖁᑎᖏᑦ ᐱᓇᓱᐊᒐᖃᕈᓐᓇᖅᐸᑕ ᑐᐊᕕᐊᕆᓗᒋᑦ ᓇᓗᓇᐃᖅᑕᐅᒪᒌᖅᓯᒪᔪᑐᑦ ᐃᓄᐃᑦ ᓄᓇᓕᖏᓐᓄᑦ, ᐊᖏᖃᑎᒌᓐᓂᕐᒧᑦ ᐸᕐᓇᐸᓪᓕᐊᒍᑎᑎᒍᑦ ᐊᒻᒪᓗ ᒐᕙᒪᒃᑯᑦ ᑎᒥᖁᑎᖏᓐᓄᑦ.
    2. ᐱᓕᕆᐊᕆᔭᐅᓂᖓ ᓇᓗᓇᐃᖅᑕᐅᒌᖅᓯᒪᓕᖅᐸᑕ ᓱᑯᑦᓯᖏᑦ ᐋᔩᖃᑎᒌᒍᑕᐅᓯᓂᐊᖅᑐᑦ ᑭᒃᑯᓐᓄᑦ ᑐᕌᖓᒐᔭᕐᒪᖔᑕ, ᒐᕙᒪᒃᑯᑦ ᕿᒥᕐᕈᒋᐊᖅᑐᑦᓴᐅᔪᑦ ᐃᓄᐃᑦ ᐊᑐᐊᒐᑦᓴᖏᓐᓂᒃ, ᐃᑲᔫᑎᑦᓴᑦᓯᐊᕙᐅᔪᓂᒃ ᑲᑎᖅᓱᐃᒍᑎᒋᓗᒋᑦ ᐊᐅᓚᑦᓯᔨᐅᓂᕐᒧᑦ ᖃᐅᔨᓴᕐᓂᒧᓪᓗ ᐃᓕᓐᓂᐊᕈᑎᑦᓴᖃᕐᓗᓂ ᐱᔨᑦᓯᕋᐅᑎᖃᕐᓗᓂᓗ ᐃᖅᑲᓇᐃᔮᑦᓴᖃᖁᓪᓗᒋᑦ ᐃᓄᐃᑦ ᖃᓂᒋᔭᖏᓐᓂ ᓄᓇᓕᖏᑦᑕ.
  2. ᒐᕙᒪᒃᑯᖏᑦ ᑲᓇᑕᐅᑉ ᓯᕗᒧᐊᑉᐸᓪᓕᐊᔪᑦᓴᐅᕗᑦ ᓇᓗᓇᐃᖅᓯᕙᓪᓕᐊᓂᒃᑯᑦ ᐊᑐᐊᒐᑦᓴᓂᒃ ᐊᒻᒪᓗ ᒪᓕᒐᕐᓂᒃ ᐊᑐᖅᑕᐅᒋᐊᖃᕋᔭᖅᑐᓂᒃ ᓄᓇᖃᖅᑳᖅᓯᒪᔪᑦ ᓴᐳᑎᔭᐅᒋᐊᖃᖅᑐᑦ ᓄᓇᐃᑦ (IPA) ᐊᑐᖅᑕᐅᓗᑎᒃ ᓄᑖᓄᑦ ᐱᓕᕆᐊᑦᓴᐅᔪᓄᑦ ᐃᒪᕐᒥᐅᑕᓄᑦ ᒥᓇᐅᒥᑦᓯᒐᓱᐊᕈᑕᐅᒐᔭᖅᑐᓂ.
    1. ᖄᖓᒍᒃᑲᓐᓂᖅ ᐱᓇᓱᐊᒐᕆᒍᒪᔭᖏᑕ ᑎᑭᐅᑎᓂᕐᒧᑦ 10% ᑎᑭᐅᑎᒍᒪᓯᒪᔭᖏᑕ, ᒐᕙᒪᒃᑯᑦ ᐃᓱᒪᖅᓴᖅᓯᐅᖅᑐᑦᓴᐅᓕᖅᑐᑦ ᐱᓇᓱᐊᒐᖃᕐᓂᕐᒥ ᐃᓘᓐᓇᑦᓯᐊᖏᓐᓄᑦ ᓄᓇᖃᖅᑳᖅᓯᒪᔪᑦ ᓴᐳᑎᒍᒪᔭᖏᑦ ᓄᓇᐃᑦ ᐊᑐᐊᒐᐅᓇᔭᖅᑐᒥ ᐃᒪᕐᒥᐅᑕᓕᕆᓂᕐᒧᑦ ᒪᑭᑕᑦᓯᐊᕈᑕᐅᒍᓐᓇᕐᓗᓂ ᑕᒪᑐᒪ ᐊᑖᓂ ᓄᑖᑉ, ᑕᐅᑐᙳᐊᖃᑎᒌᓐᓂᖅ ᐅᑭᐅᖅᑕᖅᑐᒥ.
    2. ᐅᓇ ᐱᒻᒪᕆᐅᔪᖅ ᐃᓗᐊᓂ ᓄᓇᖃᖅᑳᖅᓯᒪᔪᑦ ᓴᐳᑎᒍᒪᔭᖏᑦ ᓄᓇᐃᑦ ᕿᒥᕐᕈᔭᐅᒋᐊᖃᖅᑐᖅ ᐱᕈᖅᐸᓪᓕᐊᒍᑎᑦᓴᑦ ᑲᑎᖅᓱᖅᑕᐅᓗᑎᓗ ᐊᐅᓚᑦᓯᔨᑦᓴᐃᑦ ᖃᐅᔨᓴᕈᑎᑦᓴᐃᑦ ᐃᓕᓐᓂᐊᕈᑎᑦᓴᐃᓪᓗ ᐃᖅᑲᓇᐃᔮᑦᓴᐃᓪᓗ ᓴᖅᑭᖅᑎᑕᐅᒋᐊᖃᕋᔭᕇᖅᑐᑦ ᐊᑖᓂ 10% ᑎᑭᐅᑎᒍᒪᔭᖏᑕ ᐅᑭᐅᖅᑕᖅᑑᑉ ᓯᓈᖓᓃᑦᑐᓕᒫᖏᓐᓂ ᐸᖅᑭᑦᓯᓂᕐᒧᑦ ᐱᓕᕆᐊᒥ.
    3. ᒐᕙᒪᒃᑯᑦ ᓇᓗᓇᐃᖅᓯᔭᕆᐊᖃᖅᑐᑦ ᐊᑐᖅᑕᐅᒍᓐᓇᕋᔭᖅᑐᓂᒃ ᓯᕗᓂᑦᑎᓐᓂ ᑮᓇᐅᔭᖃᖅᑎᑕᐅᓂᕐᒧᑦ ᓄᓇᖃᖅᑳᖅᓯᒪᔪᑦ ᓴᐳᑎᒍᒪᔭᖏᑕ ᓄᓇᐃᑦ ᑕᒪᓐᓇᓗ ᐃᓕᑕᖅᓯᔭᕆᐊᖃᖅᑐᑦ ᐃᓄᐃᑦ ᐃᓚᐅᓂᕆᒐᔭᖅᑕᖏᓐᓂ ᐸᖅᑭᑦᓯᓂᕐᒥ ᐅᑭᐅᖅᑕᖅᑐᐃᑦ ᐃᒪᖁᑎᖏᓐᓂ ᐃᓘᓐᓇᖏᓐᓄᑦ ᑲᓇᑕᒥᐅᑕᓄᑦ.
    4. ᖃᐅᔨᓴᕐᓂᕐᒥ ᐃᖅᑲᓇᐃᔮᑦᓴᑦ ᓴᖅᑭᕋᔭᖅᑐᑦ ᑕᒪᑐᒪ ᐃᓗᐊᓂ ᓴᓇᔭᐅᔭᕆᐊᖃᖅᑐᑦ ᐊᑕᖏᕐᓗᒋᑦ ᐃᖅᑲᓇᐃᔭᖅᑐᓕᕆᒍᑎᖏᑦ, ᑕᒪᒃᑯᐊ ᐃᖅᑲᓇᐃᔮᑦᓴᑦ ᓴᖅᑭᖅᑎᑕᐅᒐᔭᕋᓗᐊᖅᑎᓪᓗᒋᑦ ᒥᕐᖑᐃᓯᕐᕕᓕᕆᓂᒃᑯᑦ, ᖃᐅᔨᓴᖅᑕᐅᒋᐊᖃᕐᓂᖏᑦ ᒐᕙᒪᒃᑯᑦ ᐊᓯᖏᓪᓗ ᑎᒥᐅᔪᑦ ᑲᔪᓯᒌᐊᖃᕐᒥᔪᑦ (ᐆᑦᑑᑎᒋᓗᒋᑦ. ᐃᖏᕐᕋᔪᓕᕆᒍᑏᑦ, ᐃᒪᕐᒥᐅᑕᓕᕆᔨᒃᑯᑦ, ᐅᓇᑕᖅᑐᓕᕆᔨᒃᑯᑦ), ᑲᔪᔨᑦᓯᐊᓂᖅᓴᐅᓚᕿᓕᕐᓗᑎᑦ ᐊᐅᓚᔾᔪᑎᖏᑦ ᐊᒻᒪᓗ ᖁᒡᕙᖅᑎᕆᓂᒃᑯᑦ ᓄᓇᓕᓐᓄᑦ ᐊᑐᖅᑕᐅᒍᒪᔪᓂ ᐱᔨᑦᓯᕋᕐᓂᕐᒧᑦ ᑎᒍᒥᐊᖅᑕᐅᓗᐊᖃᑦᑕᖅᓯᒪᑦᓱᑎᓗ ᖃᓪᓗᓈᓃᖔᖅᑐᓄᑦ ᐱᓕᕆᔾᔪᑎᓄᑦ ᖃᐅᔨᒪᓂᐅᔪᓄᓪᓗ.
  3. ᒐᕙᒪᒃᑯᑦ ᑲᓇᑕᒥ ᑐᐊᕕᐊᕆᔪᑦᓴᐅᓕᖅᑕᖓᑦ ᐱᔭᕆᖅᑕᐅᒐᓱᐊᕐᓂᖓ ᑕᓪᓗᕈᑎᐅᑉ ᐃᒪᖁᑎᖓ ᓴᐳᑎᔭᐅᓕᕐᓗᓂ ᐊᑐᕐᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᓄᓇᖁᑎᖏᓐᓂ.
    1. ᑕᓪᓗᕈᑎᐅᑉ ᑕᕆᐅᖓ, ᐃᓚᒋᔭᐅᖃᑕᐅᔪᖅ ᐱᒻᒪᕆᐅᓂᖅᐸᐅᓪᓗᓂ ᐃᓕᖅᑯᓯᑐᖃᖅᑎᒍᑦ ᐊᒻᒪᓗ ᓂᕐᔪᑎᖃᕐᕕᐅᓂᖓᒍᑦ ᐱᒻᒪᕆᐅᓂᖅᐸᐅᖃᑕᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐅᖃᐅᓯᐅᖃᑦᓕᖅᑭᑦᑖᓕᖅᑐᖅ ᐅᑭᐅᖅᑕᖅᑐᒥ ᓂᕐᔪᑎᓄᑦ ᐊᖅᑯᓵᖅᑕᕐᕕᐅᒋᐊᖓ.
    2. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᑦᓯᕋᐅᑎᓕᐅᖅᓯᒪᔪᑦ ᐊᖏᓪᓕᒋᐊᖅᑕᐅᖁᓪᓗᒍ 109,000 ᓯᒃᑭᑦᑕᓂᒃ ᑭᓛᒥᑕᓂᒃ ᑖᓐᓇᓗ ᓇᒻᒥᓂᖅ ᑎᑭᐅᑎᕙᓪᓕᑎᑦᓯᒐᔭᖅᑐᖅ 2%-ᒥ ᒐᕙᒪᒃᑯᑦ ᐊᑐᕈᒪᓯᒪᔭᖏᓐᓂ 5%-ᓂᒃ ᐅᑭᐅᖅᑕᖅᑐᐃᑦ ᐃᒪᑯᑎᖏᓐᓂ ᑎᑭᐅᑎᒍᓂ 2017.

ᐊᓯᖏᑦ ᐊᑐᓕᖁᔨᒍᑏᑦ

ᐅᖃᖅᑲᐅᒐᒪ ᓯᕗᓂᐊᒍᑦ, ᐊᒥᓱᑦ ᐅᖃᖃᑎᒋᒍᑎᒋᖃᑦᑕᓚᐅᖅᑕᒃᑲ ᓄᑖᓂᒃ ᐱᓇᓱᐊᒐᐅᒍᒪᔪᓂᒃ ᐅᑭᐅᖅᑕᑐᒥ ᐅᖃᖃᑎᒌᓐᓂᒃᑯᑦ ᓴᖑᑐᐃᓐᓇᖃᑦᑕᓚᐅᖅᑐᑦ ᐊᑐᐊᒐᓕᕆᓂᕐᒨᖓᔪᑦ ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑎᒌᓐᓂᕐᒧᑦ ᐊᑐᐊᒐᐅᔪᒧᑦ. ᓇᓗᓇᐃᖅᓯᓯᒪᔪᖓ ᐅᖃᖃᑎᒌᒃᑲᓐᓂᕈᑎᐅᒍᓐᓇᖅᑐᓂ ᕿᒥᕐᕈᒋᐊᒃᑲᓐᓂᕐᓂᐊᖅᑕᒃᑲᓕ ᑐᖏᓕᐊᒍ ᐱᓕᕆᐊᒻᒪ:

ᓱᓇᐃᑦ ᑭᖑᓪᓕᐅᕙᑦ?

ᒫᓐᓇᒥ ᑎᑭᒐᓱᐊᕐᓂᖓᓄᑦ ᕕᕗᐊᕆ 2017, ᐸᕐᓇᓯᒪᔪᖓ ᐱᔭᕇᕐᓂᖃᕐᓂᐊᕆᐊᖅ ᐊᐃᑉᐸᖓᓂᒃ ᐅᖃᖃᑎᒋᓐᓂᒃᑯᑦ ᑕᒪᑐᒥᖓ ᐱᓕᕆᐊᖑᔪᒥ. ᒫᓐᓇᒧᑦ ᑎᑭᓪᓗᒍ ᐃᓚᖏᓐᓂᒃ ᑲᑎᖃᑎᖃᕈᓐᓇᖅᓯᓯᒪᙱᑦᑐᖓ ᐃᓄᓐᓂᒃ, ᓄᓇᖃᖅᑳᖅᓯᒪᔪᓂ ᐊᒻᒪᓗ ᐊᓪᓚᖓᔪᐃᑦ ᓯᕗᓕᖅᑎᖏᓐᓂ ᐃᓚᒋᔭᐅᓪᓗᑎᒃ ᔫᑳᓐ ᐊᒻᒪᓗ ᓂᐅᕙᓐᓛᓐ ᒐᕙᒪᒃᑯᖏᓐᓂ, ᑕᐃᒪᐃᒻᒪᑦ ᑕᒪᒃᑯᐊ ᐱᓇᓱᐊᑦᓴᐅᑎᒋᓂᐊᖅᑕᒃᑲ. ᐱᓇᓱᐊᖃᑎᖃᕈᒪᒻᒥᔪᖓ ᐊᓪᓚᑦᑎᒻᒪᕆᒻᒥᒃ ᑐᑭᓯᒋᐊᖅᕕᑦᓴᒥᒃ ᓇᓗᓇᐃᔭᐃᓯᒪᔪᒥ ᑲᑎᒪᖃᑎᐅᓯᒪᔪᓂᒃ ᑎᑎᕋᕈᑎᐅᓯᒪᔪᓂᓪᓗ ᐱᓇᓱᐊᕈᑎᒋᓗᒍ ᐃᓱᐊᓂ ᐅᓂᒃᑳᓕᐊᑦᓴᖅ.

ᑲᔪᓯᑦᓯᐊᐸᓪᓕᐊᔪᖓ ᐅᖃᖃᑎᒌᓐᓂᒃᑯᑦ ᒫᓐᓇᒧᑦ, ᑭᓯᐊᓂᓕ ᐊᒥᓱᒻᒪᕇᑦ ᐃᓚᐅᔾᔪᑎᓖᑦ ᐅᖃᕐᕕᒋᒋᐊᖃᐃᓐᓇᖅᑕᒃᑲ, ᐃᓚᖏᓪᓗ ᐅᑎᕐᕕᒋᒃᑲᓐᓂᕆᐊᖃᖅᓱᒋᑦ ᐃᑎᓂᖅᓴᒃᑯᑦ ᐅᖃᖃᑎᒋᒃᑲᓐᓂᕐᓗᒋᑦ. ᐆᑦᑑᑎᒋᓗᒍ, ᐅᖃᖃᑎᒋᕙᓪᓕᐊᓯᒪᔭᕋᓗᐊᒃᑲ ᓄᓇᑦᓯᐊᒦᑦᑐᑦ ᑕᐃᒪᐃᒻᒪᑦ ᐅᖃᖃᑎᒌᒃᑲᓐᓂᕆᐊᖃᖅᑐᒍᑦ ᑕᒪᒃᑯᐊᓗ ᐃᓂᑦᓴᓕᐅᖅᑕᐅᓂᐅᓴᔪᑦ ᐱᒍᓐᓇᖅᓯᑦᑕᑐᐊᕈᑎᑦ. ᑕᒪᓐᓇ ᐱᔭᕆᐊᑭᙱᑦᑐᐹᓗᒃ ᐊᒻᒪᓗ ᕿᓂᕈᑎᖃᙱᑦᑐᖓ ᐃᖏᖃᑎᒌᑦᑎᓯᓂᕐᒥ, ᑭᓯᐊᓂᓕ ᑐᓴᕈᒪᓂᐊᖅᑐᖓ ᐊᑕᖏᕋᓱᐊᕐᓗᒋᑦ ᐃᓱᒪᒋᔭᐅᔪᑦ.

ᒥᓇᐅᒥᑦᓯᒪᔪᓕᕆᓂᕐᒥ ᐱᓇᓱᐊᒐᖃᕋᓗᐊᖅᑎᓪᓗᖓ ᑕᒪᑐᒥᖓ ᐱᓕᕆᐊᒥ ᓯᕗᓪᓕᖅ, ᐱᓇᓱᐊᕐᓂᕋ ᑕᑯᓐᓇᖅᑕᕋ ᐊᑐᐃᓐᓇᐅᒍᓐᓇᓂᓐᓂᒃ ᑲᑎᑎᕆᓂᒃᑯᑦ ᐃᓱᒪᒋᔭᐅᔪᓂ ᖃᓄᖅ ᓄᑖᒥᒃ ᒫᓐᓇᐅᓕᖅᑎᓪᓗᒍ ᒥᓇᐅᒥᑦᓯᒐᓱᐊᕈᑏᑦ ᐊᒻᒪᓗ ᐱᕈᖅᐸᓪᓕᐊᑦᓯᐊᕈᓐᓇᕐᓂᖅ ᐅᑭᐅᖅᑕᖅᑐᒥ ᒐᕙᒪᒃᑯᑦ ᐊᑐᕈᒪᓯᒪᔭᖏᓐᓄᑦ ᐊᑐᓕᕈᓐᓇᖅᑐᖅ ᒪᒥᓴᕈᑕᐅᓪᓚᕆᓕᕐᓗᓂ ᓄᓇᖃᖅᑳᖅᓯᒪᔪᓄᑦ. ᐊᑯᓂᕐᔪᐊᖅ ᓵᓚᐅᒪᖃᑦᑕᖅᓯᒪᓂᖏᑦ ᓄᓇᖃᖅᑳᖅᓯᒪᙱᑦᑐᓄᑦ ᐊᑦᓱᕈᖅᑎᑦᓯᓂᐅᓯᒪᔪᐃᓪᓗ ᐳᐃᒍᑐᐃᓐᓇᕋᑦᓴᐅᙱᑦᑐᑦ. ᒪᒥᓴᕐᓂᖅ ᐱᔾᔪᑎᖃᕆᐊᖃᖅᑐᖅ ᐱᕈᖅᐸᓪᓕᐊᖃᑎᒌᓐᓂᒃᑯᑦ ᓱᓕᔪᖅᓴᖃᑎᒌᒍᓐᓇᓂᒃᑯᑦ, ᓴᙱᔫᓂᖅᓴᓂᒃ ᐊᔾᔨᒌᓐᓂᖅᓴᓂᓗ ᐃᓚᒌᒍᑎᖃᓕᕐᓗᑎᒃ, ᑎᒍᒥᐊᖅᑕᐅᑦᓯᐊᕐᓗᓂᓗ ᐱᑦᓯᐊᖅᑕᐅᓂᒃᑯᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᑦ, ᐱᐅᓯᑐᖃᖏᑦ ᐊᒻᒪᓗ ᐊᑐᕈᒪᔭᖏᑦ. ᖃᓄᐃᙱᓯᐊᖏᑐᐊᕈᑎᑦ, ᐅᐱᒍᓱᓐᓂᖃᑦᓯᐊᙱᑐᐊᕈᑎᑦ, ᐊᒻᒪᓗ ᓯᕗᓂᑦᓴᒧᑦ ᓂᕆᐅᓐᓂᖃᑦᓯᐊᙱᑐᐊᕈᑎᑦ ᐅᑭᐅᖅᑕᖅᑐᒥᐅᑕᓄᑦ, ᐱᕈᖅᐸᓪᓕᐊᑦᓯᐊᕐᓂᐊᓐᖏᑦᑐᑦ ᐊᔾᔨᒌᑦᓯᐊᖅᑐᒃᑯᑦ ᒪᒥᓴᕐᓂᖃᕈᓐᓇᕋᔭᕋᓂᓗ ᐅᑭᐅᖅᑕᖅᑐᒥᐅᑕᐃᑦ ᓄᓇᖃᖅᑳᖅᓯᒪᔪᖁᑎᖏᓐᓄᑦ.

ᐅᐃᒍᖅ 1: ᑭᒃᑰᓂᖏᓐᓂ ᐅᖃᖃᑎᒌᖃᑎᐅᒌᖅᓯᒪᔪᑦ ᓇᓗᓇᐃᖅᓯᒍᑦ ᐊᐅᒍᓯ 5ᒥᑦ ᐅᑐᐱᕆ 31, 2016ᒧᑦ

ᖃᐅᔨᒪᓂᐊᖅᑯᑎᑦ ᐱᓕᕆᐊᖃᖅᓯᒪᓕᕋᒪ, ᑲᔪᓯᑎᕙᓪᓕᐊᖏᓐᓇᖅᓱᒍᓗ ᐸᕐᓇᐸᓪᓕᐊᓂᒃᑯᑦ ᐅᖃᖃᑎᒌᓐᓂᒃᑯᑦ ᓯᕗᓕᖅᑎᐅᔪᓂᑦ ᖃᐅᔨᒪᔪᒻᒪᕆᓐᓂᓗ ᐅᑭᐅᖅᑕᖅᑐᖓᓂ ᑲᓇᑕᐅᑉ. ᐅᖃᖃᑎᒌᓐᓂᖅ ᓱᓕ ᐃᓱᓕᙱᑦᑐᖅ ᐊᒥᓱᐃᑦ ᑎᒥᐅᔪᑦ ᐊᓚᐅᖃᑕᐅᓚᐅᙱᒻᒪᑕ ᓱᓕ. ᑖᓐᓇ ᓇᐃᓪᓕᒋᐊᖅᓯᒪᔪᖅ ᐱᔾᔪᑎᖃᖅᑐᕐᓕ ᑲᑎᖃᑎᒋᓯᒪᔭᕐᓂᑦ ᐅᖃᖃᑎᒌᓐᓂᒃᑯᑦ ᑭᓯᐊᓂ.

ᐅᐃᒍᖅ 2: ᓇᐃᓪᓕᒋᐊᖅᓯᒪᔪᖅ ᐅᓂᒃᑳᓕᐊᖅ "ᕿᒥᕐᕈᔭᐅᓂᖓ ᐃᓱᒪᒋᔭᐅᓯᒪᔪᖅ ᓄᓇᖃᖅᑳᖅᑐᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ ᐊᒻᒪᓗ ᐊᑐᓕᖅᑎᑕᐅᒍᓐᓇᕐᓂᖓ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᐱᔾᔪᑕᐅᓗᐊᕐᓗᑎᑦ ᐃᒪᕐᒥᐅᑕᓄᑦ ᓇᔪᒐᐃᑦ"

ᑖᓐᓇ ᐅᓂᒃᑳᓕᐊᖅ ᕿᒥᕐᕈᓂᖃᖅᑐᖅ ᐃᓱᒪᒋᔭᐅᓯᒪᔪᒥᒃ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ (IPA) ᐃᑯᓂᖓ ᐱᔾᔪᑎᖃᖅᓱᑎᒃ:

  1. ᐊᑐᕐᓂᐊᕐᓂᕋᕈᑎᒋᓯᒪᔭᖏᑦ ᒐᕙᒪᑐᖃᒃᑯᑦ ᑲᓇᑕᒥ ᒪᒥᓴᕐᓂᒥ ᐊᑯᓐᓂᖏᓐᓂ ᑕᒪᐅᖓ ᑎᑭᐅᑎᓯᒪᔪᑦ ᐊᒻᒪᓗ ᓄᓇᖃᖅᖄᖅᓯᒪᔪᓂ ᑲᓇᑕᒥ,
  2. ᒐᕙᒪᒃᑯᑦ ᐊᑐᕐᓂᐊᕐᓂᕋᖅᓯᒪᔭᖓᑦ ᐱᓕᕆᐊᖃᕐᓂᕈᒪᓂᕐᒥ ᐊᓯᖏᓐᓂ ᓴᐳᑎᔭᐅᒃᑲᓐᓂᕈᓐᓇᖅᑐᓂ, ᐱᓗᐊᖅᑐᒍ ᐅᑭᐅᖅᑕᖅᑐᒥ ᐃᒪᕐᒥᐅᑕᓄᑦ ᓇᔪᖅᑕᐅᕙᑦᑐᑦ ᐱᓪᓗᒋᑦ, ᐊᒻᒪᓗᑦᑕᐅᖅ
  3. ᒐᕙᒪᒃᑯᑦ ᐅᖃᖃᑎᖃᕆᐊᖃᕐᓂᖓ ᐊᑐᐃᓐᓇᐅᒍᓐᓇᕐᓗᑎᓗ ᓴᖅᑭᖅᑎᕆᓂᒃᑯᑦ ᓄᑖᓂᒃ ᓴᐳᑎᔭᐅᒋᐊᖃᖅᑐᓂᒃ ᐊᕙᑎᓂᒃ ᐊᓯᖏᓪᓗ ᐊᑐᕆᐊᖃᖅᓯᒪᔭᖏᑦ ᒪᓕᓪᓗᒋᑦ ᓄᓇᑖᕈᑎᓄᑦ ᐊᖏᕈᑎᐅᓯᒪᔪᑦ ᒫᓐᓇᐅᓕᖅᑐᖅ.

ᑖᓐᓇ ᓄᓇᖃᖅᑳᖅᓯᒪᔪᑦ ᓴᐳᑎᒍᔭᒪᖏᑦ ᓄᓇᐃᑦ ᐃᓱᒪᒋᔭᐅᓪᓚᕆᑦᓯᒪᔪᖅ ᐱᒋᐊᖅᑎᑕᐅᓯᒪᓪᓗᓂᓗ ᐋᔅᑐᐃᓕᐊᒥ, ᑕᐃᒎᓯᖅᑕᖓ ᐊᑐᖅᑕᐅᖏᒃᑲᓗᐊᖅᑎᓪᓗᒍ ᒪᓕᒐᕐᓂ ᐅᖃᐅᓯᐅᔪᓂ ᐱᒻᒪᕆᐅᓯᒪᓕᖅᑐᖅ ᐊᑐᐊᒐᓕᐅᕈᑎᓂ ᑲᑎᑎᑦᓯᓂᒃᑯᑦ ᐊᑐᕈᒪᔭᖏᓐᓂ ᒐᕙᒪᕐᔪᐊᒃᑯᖏᑕ ᐊᒻᒪᓗ ᐊᕕᑦᑐᖅᓯᒪᔪᓂ ᒐᕙᒪᐅᔪᑦ ᐱᔭᕇᖅᓯᒍᑭᖃᖅᓱᑎᒃ ᐊᖏᓪᓕᒋᐊᕈᑎᖃᖅᓱᑎᓗ ᓴᐳᑎᔭᐅᔪᓂᒃ ᓄᓇᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᒥᓂ ᐊᐅᓚᑦᓯᒍᓐᓇᐅᑎᓄᑦ ᐱᓕᕆᐊᖑᔪᑦ ᐆᑦᑑᑎᒋᓗᒍ ᐸᖅᑭᑦᓯᓂᖅ 'ᓄᓇᓕᕐᔪᐊᒧᑦ' ᐊᑐᐃᓐᓇᕐᓗᑎᒃ 'ᖃᓄᐃᙱᓯᐊᖅᓂᒃᑯᑦ ᓄᓇᓕᕐᔪᐊᒥᐅᑕᐅᖃᑎᒌᑦᑐᓄᑦ' ᐊᒻᒪᓗ ᖃᓄᐃᙱᓯᐊᕐᓗᑎᒃ ᓄᓇᒥᓂ ᑎᒍᓯᒃᑲᓐᓂᕈᓐᓇᕐᓗᑎᒃ. ᓯᕗᓪᓕᕐᒥ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᓯᒪᔪᑦ ᑐᙵᕕᖃᓗᐊᖃᑦᑕᖅᓯᒪᔪᑦ ᓄᓇᖃᖅᑳᖅᓯᒪᔪᑦ ᓄᓇᖁᑎᖏᑎᒍᑦ ᑎᒃᑯᐊᖅᑕᐅᓯᒪᔪᓂ, ᐃᓚᖏᑦ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ ᐃᓕᑕᖅᓯᓯᒪᔪᑦ ᓄᓇᖃᖅᑳᖅᓯᒪᔪᑦ ᓄᓇᓂᒃ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᓄᓇᖁᑎᐅᒌᙱᑦᑐᓂ. ᐃᓚᖏᑦ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᔪᑦ ᐃᒪᕐᒥᐅᑕᓄᑦ ᑎᑭᐅᑎᓯᒪᔪᑦ. ᓄᓇᖃᖅᑳᖅᑐᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ ᐊᑐᖅᑕᐅᓯᒪᓕᖅᑐᑦ ᐆᑦᑐᕋᐅᑎᐅᓂᒃᑯᑦ ᐊᓯᖏᓐᓄᑦ ᓄᑖᓄᓪᓗ ᓴᐳᑎᔭᐅᒋᐊᓕᓐᓄᑦ. ᑖᓐᓇ ᓄᓇᖃᖅᑳᖅᓯᒪᔪᑦ ᓴᐳᑎᒍᒪᓂᕐᒧᑦ ᐃᓱᒻᒪᓯᖅ ᓴᖑᑎᑕᐅᒍᓐᓇᕐᓗᓂ ᐊᑐᖃᑦᓴᑦᓯᐊᖑᔪᖅ ᐊᑐᓕᖅᑎᑕᐅᒍᓐᓇᖅᓱᓂᓗ ᓇᐅᒃᑯᑐᐃᓐᓇᖅ ᒪᓕᒐᖅᑎᒍᑦ ᐃᓚᐅᑎᓪᓗᒋᑦ:

  1. ᐊᑐᖅᑕᐅᓂᖓ ᓄᓇᖃᖅᑳᖅᓯᒪᔪᑦ ᓇᓗᓇᐃᖅᑕᐅᒍᑎᖓᓂ ᓄᓇᓕᕐᔪᐊᓂ ᐅᒡᕙᓘᓐᓃᑦ ᓄᓇᓂ ᐊᕕᑦᑐᖅᓯᒪᔪᓂ,
  2. ᐊᑐᖅᑕᐅᒌᕐᓂᖓ ᑎᒃᑯᐊᖅᓯᒍᑎᐅᓯᒪᔪᖅ ᓄᓇᓕᕐᔪᐊᓂ ᐊᕕᑦᑐᖅᓯᒪᔪᖁᑎᖏᓐᓂᓘᓐᓃᑦ ᓴᐳᑎᔭᐅᓯᒪᔪᓂ ᒪᓕᒐᖅᑎᒍ ᑕᐱᖃᖅᓱᓂ ᑲᒪᒋᔭᐅᑦᓯᐊᖅᓯᒪᔪᓂ ᐊᖏᕈᑎᓂ ᐊᒻᒪᓗ ᐃᒻᒪᖄ ᐊᑐᖅᑐᐊᕈᑎᒥ ᐊᖏᖃᑎᒌᒍᑏᑦ, ᐅᒡᕙᓘᓐᓃᑦ
  3. ᑎᒃᑯᐊᖅᑕᐅᓯᒪᓪᓚᕆᑦᑐᖅ ᐅᖃᐅᓯᑦᓴᐅᔪᖅ ᐱᓇᐃᓗᑕᐅᔪᓄᑦ.

ᐃᓕᑕᕐᓇᖅᑐᑦ ᐱᓕᕆᐊᖑᔪᓂ ᐃᓚᐅᖃᑕᐅᑎᓪᓗᒋᑦ ᐃᓕᑕᖅᓯᔭᕆᐊᖃᕐᓂᖅ ᓄᓇᖃᖅᑳᖅᓯᒪᔪᓂᒃ ᐃᓚᐅᖃᑕᐅᒋᐊᖃᓂᖏᓐᓂ ᐱᓕᕆᐊᖑᑎᓪᓗᒍ, ᓴᐳᑎᔭᐅᑎᓪᓗᒍ ᐊᒻᒪᓗ ᐊᐅᓚᑕᐅᑎᓪᓗᒍ ᐱᓕᕆᕕᐅᔪᖅ, ᐊᓯᖏᓪᓗ ᐊᑦᑐᐊᖃᓯᐅᑎᔪᑦ ᐱᓕᕆᐊᖑᔪᑦ ᐃᓚᐅᑎᓪᓗᒋᑦ ᐊᑎᓕᐅᕆᓂᐅᕙᑦᑐᑦ ᐊᒻᒪᓗ ᑮᓇᐅᔭᖃᖅᑎᑕᐅᓂᐅᕙᑦᑐᑦ ᓄᓇᖃᖅᑳᖅᓯᒪᔪᓄᑦ ᐋᔩᖃᑎᒌᒃᑲᓐᓂᖁᓪᓗᒋᑦ ᓴᙱᓂᖅᓴᒃᑯᑦ ᐊᑐᓚᑕᐅᓂᖏᓐᓄᑦ ᐱᓕᕆᐊᖑᒌᖅᑐᑦ ᒐᕙᒪᒃᑯᓐᓄᑦ ᑕᐃᔭᐅᒪᔪᑦ ᒥᕐᖑᐃᓯᕐᕖᑦ ᐊᓯᖏᓪᓗ ᐊᕙᑏᑦ ᓴᐳᑎᔭᐅᒪᔪᑦ.

ᐊᓯᖏᓐᓂ ᐆᑦᑐᕋᐅᑎᐅᒍᓐᓇᑦᑐᓂ ᐱᑕᖃᕇᖅᑐᖅ ᐊᓯᖏᓐᓂ ᓄᓇᓕᕐᔪᐊᓂ. ᐅᓇ ᐱᓗᐊᖅᑐᒥ ᐅᖃᐅᓯᕆᔭᑦᓴᖅ ᐅᑦᑐᕋᐅᑎᑦᓴᑦᓯᐊᕙᐅᓪᓗᓂᓗ ᑲᑐᔾᔨᖃᑎᒌᓐᓂᕐᒧᑦ ᒥᓯᒪᔪᖅ ᓂᐅ ᔩᓚᓐ-ᒥ ᑕᐃᑲᓂ ᑎ ᐅᕆᔨᕋ ᒥᕐᖑᐃᓯᕐᕕᒃ ᒪᑭᑕᐅᒃᑲᓂᖅᓯᒪᒋᐊᖓ ᒪᓕᒐᖅᑎᒍᑦ ᓴᐳᑎᔭᐅᓯᒪᓪᓗᓂ ᓇᒻᒥᓂᑦ, ᓇᒻᒥᓂᕐᓗ ᒪᓕᕋᖅᑎᒍᑦ ᐃᓕᑕᕆᔭᐅᓯᒪᓕᖅᓱᓂ ᐱᔪᓇᐅᑎᖃᕆᐊᖅ. ᒪᓕᒐᖅᑎᒍᑦ ᓄᑖᒥᒃ ᐃᓕᑕᖅᓯᒍᑎᖓ ᐃᓕᖅᑯᓯᖃᑎᒌᙱᑦᑐᓂ ᐊᒻᒪᓗ ᐱᒻᒪᕆᐅᓂᖓᓂ ᐊᕙᑎᖓᑕ.

ᐱᖓᓲᔪᑦ ᐊᑐᖅᑕᐅᒍᓐᓇᖅᑐᑦ ᒐᕙᒪᑐᖃᒃᑯᑦ ᒪᓕᒐᖓᑎᒍᑦ ᓴᖅᑭᖅᑎᑕᐅᓗᑎᒃ ᐃᒪᕐᒥᐅᑕᓄᑦ ᓇᔪᖅᑕᐅᕙᑦᑐᓂ ᓴᐳᑎᔭᐅᔪᓂᒃ (MPA) ᑲᓇᑕᒥ:

  1. s.35 ᐃᒪᕐᒥᐅᑕᓕᕆᓂᕐᒧᑦ ᒪᓕᒐᖅ,
  2. ᓴᐳᑎᔭᐅᓯᒪᔪᖅ ᐃᒪᕐᒥᐅᑕᓄᑦ ᓇᔪᖅᑕᐅᕙᑦᑐᓂ ᐊᑖᒍᑦ ᑲᓇᑕᒥ ᓂᕐᔪᑎᓕᕆᓂᕐᒧᑦ ᒪᓕᒐᖅ, ᐊᒻᒪᓗ
  3. ᑲᓇᑕᓕᒫᒥ ᐃᒪᕐᒥᐅᑕᓄᑦ ᓇᔪᖅᑕᐅᕙᑦᑐᓂ ᓴᐳᑎᔭᐅᓂᕐᒧᑦ ᓄᓇᐃᑦ ᑎᒃᑯᐊᖅᑕᐅᒪᔪᑦ (NMCA) ᐊᑖᓂ ᑲᓇᑕᓕᒫᒥ ᐃᒪᕐᒥᐅᑕᓄᑦ ᓇᔪᒐᐃᑦ ᒪᓕᒐᖅ.

ᐃᓘᓐᓇᒐᓚᖓᒍᑦ, ᒪᓕᒐᓕᐊᕆᔭᐅᓯᒪᔪᑦ ᐅᖃᐅᓯᖃᖅᓯᒪᙱᑦᑐᑦ ᓄᓇᖃᖅᑳᖅᓯᒪᔪᑦ ᐃᓚᐅᑎᑕᐅᒋᐊᖃᕐᓂᖏᓐᓂ ᐱᓕᕆᐊᕆᔭᐅᑎᓪᓗᒋᑦ ᐃᒪᕐᒥᐅᑕᓄᑦ ᓇᔪᒐᐅᔪᓂ ᓴᐳᑎᔭᐅᔭᕆᐊᓖᑦ. ᑕᒪᓐᓇ ᐊᑦᑐᐃᓂᖃᕈᓐᓇᑎᓪᓗᒍ (ᐊᑦᑐᐃᖏᒡᕕᖃᙱᑦᑐᑦ) ᓴᖅᑭᓯᒪᔪᖅ ᒪᓕᓐᓂᒃᑯᑦ ᐊᑐᐊᒐᕐᓂᒃ ᐊᒻᒪᓗ ᒪᓕᒐᐃᑦ ᐃᓕᑕᖅᓯᓯᒪᙱᑦᑐᑦ ᐊᒻᒪᓗ ᖁᕕᐊᓲᑎᖃᖅᓯᒪᙱᑦᑐᑦ ᐱᒻᒪᕆᐅᓂᖓᓂ ᓄᓇᖃᖅᑳᖅᓯᒪᔪᑦ ᐃᓚᐅᑎᑕᐅᒋᐊᖃᕐᓂᖏᓂ ᐱᓕᕆᓂᐅᔪᓂ, ᐊᐅᓚᑦᓯᓂᐅᔪᓂ ᐊᒻᒪᓗ ᓴᐳᔾᔨᓂᐅᔪᓂ ᐃᒪᕐᒥᐅᑕᐃᑦ ᓇᔪᖅᐸᑦᑕᖏᓐᓂ. ᒪᓕᒐᓕᐊᕆᔭᐅᓯᒪᔪᖅ ᐃᓚᒋᔭᐅᑐᐃᓐᓇᖅᑑᒐᓗᐊᖅ ᑭᓯᐊᓂᑦᑕᐅᖅ ᑕᒪᐅᓇ ᒪᓕᒐᖅ ᐃᓱᒪᒋᔭᖃᓗᐊᖅᓯᒪᙱᑦᑐᖅ, ᐆᑦᑑᑎᒋᓗᒍ, ᑲᑐᔾᔨᖃᑎᒌᓐᓂᖅ ᓴᐳᔾᔨᓂᒃᑯᑦ ᐅᒡᕙᓘᓐᓃᑦ ᐃᓕᖅᑯᓯᖏᑕ ᑐᙵᕕᖏᓐᓂ ᐊᑦᑐᐊᔭᐅᔪᓂ. ᐱᑕᖃᙱᑦᑐᑦ ᐅᖃᐅᓯᐅᓯᒪᔪᑦ ᐃᑲᔫᑎᑦᓴᖃᕆᐊᖏᑦ ᑮᓇᐅᔭᑎᒍᑦ ᓄᓇᖃᖅᑳᖅᓯᒪᔪᓂ ᓄᓇᓕᓐᓂ ᐱᔾᔪᑎᐅᓗᐊᕐᓗᓂ ᐸᖅᑭᑦᓯᒍᓐᓇᕐᓂᖓ ᐊᓯᖏᓪᓗ ᑲᒪᒋᔭᐅᒋᐊᓖᑦ ᐃᒪᕐᒥᐅᑕᐃᑦ ᓇᔪᖅᐸᑦᑕᖏᓐᓂ ᓴᐳᔾᔨᓂᖅ. ᐅᖃᐅᓯᕆᒃᑲᓐᓂᕐᓗᒍ, ᑖᓐᓇ ᐊᓚᒃᑲᐸᑦᑐᖅ ᐱᓇᓱᐊᖅᑐᖃᓕᕋᐃᒻᒪᑦ, ᐱᓗᐊᖅᑐᒥ ᐱᔾᔪᑎᖃᕈᑎᒃ ᐃᓄᐃᑦ ᐊᑦᑐᖅᑕᐅᓂᕆᒐᔭᖅᑕᖓᓄᑦ ᐊᖏᖃᑎᒌᒍᑏᑦ ᐊᑐᕆᐊᖃᕐᓂᖏᓐᓄᑦ ᓄᓇᑖᕈᑎᑎᒍᑦ ᐊᖏᖃᑎᒌᒍᑕᐅᓯᒪᔪᓂ ᑭᓯᐊᓂᓕ ᑖᒃᑯᐊ ᐃᓱᒪᒋᔭᐅᓯᒪᔪᑦ ᐊᓚᒃᑲᐅᒪᙱᑦᑐᑦ ᒪᓕᒐᓕᕆᓂᕐᒥ. ᐃᓱᒪᒋᔭᐅᑦᓯᐊᖅᓯᒪᔪᑦ ᐋᖅᑭᑦᑕᐅᒪᔪᑦ ᒍᐊᐄ ᕼᐋᓇᔅ-ᑯᓐᓄᑦ ᓇᓗᓇᐃᖅᓯᔪᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᐊᒻᒪᓗ ᒐᕙᒪᒃᑯᑦ ᑎᑭᐅᑎᒍᓐᓇᕐᓂᖏᓐᓄᑦ ᐱᕕᑭᑦᑑᔮᕋᓗᐊᖅᐸᑕ ᐱᓇᓱᐊᕈᑎᑦᓴᐃᑦ ᐊᑐᕐᓗᑎᒃ ᐊᐅᓚᔾᔭᒋᐊᕈᑎᑦᓴᓂᒃ ᐊᖏᖃᑎᒌᒍᑕᐅᓯᒪᔪᓂᒃ (ᐊᒻᒪᓗ/ᐅᒡᕙᓗ ᐊᓪᓚᓄᑦ ᐊᖏᖃᑎᒌᒍᑏᑦ) ᐊᑐᓕᖁᓪᓗᒋᑦ ᐱᓇᓱᐊᖃᑎᒌᓐᓂᕐᒥ ᐊᐅᓚᑦᓯᖃᑎᒌᓐᓂᕐᒥᓗ ᓴᐳᑎᔭᐅᔪᓂ ᐊᒻᒪᓗ ᐃᑲᔫᑎᑦᓴᓄᑦ ᐋᖅᑭᑦᑕᐅᒪᔪᓂ. ᑭᓯᐅᓂᓗ ᐱᒻᒪᕆᐅᔪᕐᓕ ᐃᓕᑕᕆᒍᓐᓇᕐᓗᒋᑦ ᑖᒃᑯᐊ ᐃᓱᒪᒋᔭᐅᓯᒪᔪᑦ ᐱᓇᓱᐊᒐᐅᓱᓪᓗ ᒪᓕᒐᖅᑎᒍᑦ. ᐃᓕᑕᖅᓯᓪᓚᕆᓐᓂᖅ ᐊᑐᐃᓐᓇᕈᐃᓂᐊᖅᑐᖅ ᐊᑐᐊᒐᓕᐅᕐᓂᒃᑯᑦ ᑮᓇᐅᔭᓕᕆᓂᒃᑯᓪᓗ ᐊᕕᑦᑐᖅᓯᒪᔪᓄᑦ ᐱᓕᕆᔨᐅᔪᓂ ᐃᓚᐅᑎᑦᓯᒍᓐᓇᕐᓗᓂᓗ ᖁᕕᐊᓲᑎᒋᒍᓐᓇᕐᓗᒍᓗ ᓄᓇᖃᖅᑳᖅᓯᒪᔪᑦ ᐃᓚᐅᒍᓐᓇᕐᓂᖓᑦ ᖁᑦᓯᓂᖅᐹᖏᓐᓃᑦᑐᓂ ᒪᓕᒐᕐᓂ. ᐋᖅᑭᑦᑕᐅᒪᔪᑦ ᑐᖔᓂ ᐊᕕᑦᑐᖅᓯᒪᔪᑦ ᐊᒻᒪᓗ ᒐᕙᒪᑐᖃᒃᑯᑦ (ᐆᑦᑑᑎᒋᓗᒍ ᐋᖅᑭᑦᑕᐅᓯᒪᓂᖓ ᓴᒍᐃᓂ-ᓰᓐᑦ.ᓛᕋᓐᔅ) ᕿᒥᕐᕈᔭᑦᓴᐅᒻᒥᔪᑦ ᐊᑐᐊᒐᐅᒍᓐᓇᖅᓗᑎᑦ ᐱᓇᓱᐊᖃᑎᒌᓐᓂᕐᒧᑦ ᐸᖅᑭᑦᓯᖃᑎᒌᓐᓂᕐᒧᓪᓗ.

ᐅᓂᒃᑳᓕᐊᖅ ᐊᑐᓕᕈᔨᔪᖅ ᑖᒃᑯᐊ ᐃᓱᒪᒋᔭᐅᓯᒪᔪᑦ ᐱᓇᓱᐊᖅᑕᐅᒍᒪᔪᓪᓗ ᐃᓗᐊᓃᑦᑐᑦ ᓄᓇᖃᖅᑳᖅᓯᒪᔪᓄ ᓴᐳᑎᔭᐅᒋᐊᓖᑦ ᓄᓇᐃᑦ ᕿᒥᕐᕈᔭᐅᒋᐊᖃᓪᓚᕆᑦᑐᑦ ᐅᖃᖃᑎᐅᓗᑎᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ, ᐊᕕᑦᑐᖅᓯᒪᔪᑦ ᒐᕙᒪᖏᑦ ᐊᒻᒪᓗ ᐃᓚᐅᖃᑕᐅᔪᑦ ᐱᓕᕆᐊᖑᓗᓂ ᐃᑲᔪᖅᓯᒐᔪᖅᓯᒐᔭᓪᓗᓂ ᒪᕐᕉᓐᓂ ᐱᓇᓱᐊᖅᑕᐅᔪᓂ ᒪᒥᓴᕐᓂᕐᒧᑦ ᐊᒻᒪᓗ ᐃᒍᓯᕙᓪᓕᐊᓂᕐᒧᑦ ᓴᐳᑎᔭᐅᒪᔪᓂ ᓄᓇᓂ ᐊᑐᑦᓴᐃᓐᓇᕐᓗᑎᑦ ᒪᓕᒐᕐᔪᐊᓂ ᐱᔪᓐᓇᐅᑎᒥᓂ ᐊᑐᐊᖅᓯᓗᑎᑦ ᒪᓕᒐᕐᓂᑦ ᐊᑖᓃᓪᓗᑎᓗ ᐱᒍᓐᓇᑐᐊᖅᐸᑕ ᓄᓇᑖᕈᑎᓄᑦ ᐊᖏᕈᑕᐅᓯᒪᔪᓂ. ᐱᓇᓱᐊᖅᑕᐅᓪᓇᕆᒋᐊᓕᒃ ᐅᖃᖃᑎᒌᓐᓂᐅᔪᓂ ᓇᓗᓇᐃᖅᓯᒋᐊᕐᓂᖅ ᖃᓄᖅ, ᐱᒍᓐᓇᕈᓂ, ᑎᑭᐅᑎᒍᓐᓇᕐᕕᖓᓄᑦ, ᐃᓱᒪᒋᔭᐅᓯᒪᔪᑦ ᐱᓇᓱᐊᖅᑕᐅᒍᒪᔪᐃᓪᓗ ᐃᓗᐊᓂ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ ᐃᓱᒪᒋᔭᐅᔫᑉ ᐃᑲᔪᖅᓯᒐᔭᕐᒪᖔᑕ ᐊᑐᖅᑕᐅᖃᑦᑕᕇᖅᑐᓂ ᐋᖅᑭᑦᓱᖅᑕᐅᒪᔪᓂ, ᐱᓗᐊᖅᑐᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᐅᓯᒪᔪᓂ ᑎᑎᖅᑕᐅᓯᒪᔪᑦ.

ᐃᓱᒪᒋᔭᐅᔪᑦ ᐱᓇᓱᐊᖅᑕᐅᒍᒪᔪᓪᓗ ᐃᓗᐊᓃᑦᑐᑦ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ ᐱᓇᓱᐊᕈᑎᐅᒍᓐᓇᖅᑐᑦ ᐊᔾᔨᒌᙱᑦᑐᓂ ᐃᓚᐅᑎᓪᓗᒍ ᓄᑖᖅ ᓄᓇᖃᖅᑳᖅᓯᒪᔪᓄᑦ ᓴᐳᑎᓴᐅᒍᒪᔪᑦ ᓄᓇᐃᑦ-ᑐᕌᖓᔪᖅ ᐱᔪᓐᓇᐅᑎᖏᓐᓄᑦ. ᑖᓐᓇ ᐅᓂᒃᑳᓕᐊᖅ ᐃᑲᔪᖅᑐᐃᒍᑎᐅᙱᑦᑐᖅ ᐊᑐᖅᑕᐅᒍᒪᔪᒥ ᐱᓕᕆᐊᖓᓂ ᓴᙲᓪᓕᑎᑦᓯᖁᓇᒍ ᐱᔪᓐᓇᐅᑎᐅᔪᓂ ᐊᑐᖅᑕᐅᒍᓐᓇᖅᑐᓂᓗ ᐱᓇᓱᐊᕈᑎᐅᔪᓂᓪᓗ ᐊᔪᕐᓇᓂᖅᓴᐅᓚᕿᓕᕐᓗᓂ ᓴᐳᔾᔨᓂᕐᒧᑦ ᐊᕙᑎᓂᒃ ᐊᑐᖅᑕᐅᒐᓱᐊᖅᑐᓂ. ᑖᓐᓇ ᐅᓂᒃᑳᓕᐊᖅ ᐊᑐᓕᖁᔨᔪᖅ ᕿᒥᕐᕈᒋᐊᖁᔨᓂᕐᒥ ᐊᓯᔾᔨᕆᐊᖅᑕᐅᒍᓐᓇᕐᓂᖓᓂ ᒐᕙᒪᒃᑯᑦ ᒪᓕᒐᓕᐊᕆᓯᒪᔭᖓ ᐃᒪᕐᒥᐅᑕᓄᑦ ᓇᔪᖅᑕᐅᕙᑦᑐᓂ ᓴᐳᔾᔨᓂᕐᒧᑦ ᐃᓚᐅᑎᑦᓯᒍᓐᓇᖁᓪᓗᒋᑦ ᓄᓇᖃᖅᑳᖅᓯᒪᔪᐃᑦ ᐊᑐᕈᒪᔭᖏᓐᓂ. ᐃᓱᒪᒋᔭᐅᓯᒪᔪᑦ ᐃᓚᐅᑎᑦᓯᒍᓐᓇᕆᐊᖏᑦ ᑎᒃᑯᐊᖅᓯᕙᓪᓕᐊᓂᕐᒥ ᓄᓇᓂᑦ ᓴᐳᑎᔭᐅᒋᐊᖃᖅᑐᓂ; ᑎᒍᔭᐅᓗᑎᓗ ᐸᕐᓇᑕᐅᓯᒪᒌᖅᑐᓂ ᐊᐅᓚᑦᓯᓂᕐᒧᑦ ᐃᑲᔫᑎᑦᓴᓂᓪᓗ ᐸᕐᓇᑕᐅᓯᒪᔪᓂ ᐊᖏᖃᑎᒌᓐᓂᒃᑯᑦ ᖃᓄᖅᑑᖃᑎᒌᓐᓂᒃᑯᓪᓗ; ᑕᐃᒎᓯᓕᐅᕐᓂᖅ ᐊᒻᒪᓗ ᐅᖃᐅᓯᖅᑕᕆᔭᐅᔪᓄᑦ ᐱᓇᐃᓗᑕᐅᔪᑦ; ᐃᓕᑕᕆᔭᐅᓗᑎᑦ ᑐᑭᓯᒋᐊᕐᓂᕐᒧᑦ ᑐᙵᕕᐅᔪᑦ ᐃᓚᐅᑎᓪᓗᒍ ᒪᒥᓴᕐᓂᖅ, ᐸᖅᑭᑦᓯᖃᑎᒌᒍᓐᓇᕐᓂᖅ, ᑕᐅᖅᓰᖃᑐᒌᒍᓐᓇᕐᓂᖅ, ᐃᓕᖅᑯᓯᑐᖃᖃᑎᒌᙱᓐᓂᒃᑯᑦ ᐱᓕᕆᖃᑎᒌᓐᓂᖅ, ᑭᖑᕚᑦᑎᓐᓂ ᑲᒪᑦᓯᐊᕆᐊᖃᕐᓂᖅ, ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᑦ ᐃᑉᐱᒋᔭᐅᑦᓯᐊᕐᓗᑎᑦ, ᐸᖅᑭᑦᓯᑦᓯᐊᕐᓂᕐᒧᑦ ᐱᖅᑯᓯᐅᔪᑦ ᒪᓕᒐᐅᔪᓪᓗ; ᐊᑐᖅᑕᐅᖏᓐᓇᕈᓐᓇᕐᓗᑎᑦ ᓄᓇᖃᖅᑳᖅᓯᒪᔪᓄᑦ; ᐃᑲᔫᑎᑦᓴᑦ ᐊᒻᒪᓗ ᐊᐅᓚᑦᓯᒍᑏᑦ ᐸᕐᓇᑕᐅᓯᒪᑦᓯᐊᕐᓗᑎᑦ ᐱᓇᐃᓗᑕᐅᒍᓐᓇᖅᑐᓄᑦ ᐊᑐᐃᓐᓇᖃᕈᓐᓇᕐᓗᑎᓗ ᐊᑐᖅᑕᐅᖃᑦᑕᖅᓯᒪᔪᑦ ᐱᐅᓂᖅᐹᒃᑯᑦ ᐊᑐᐊᒐᕐᓂ ᐱᔭᐅᓯᒪᓪᓗᑎᒃ ᓄᓇᑖᕈᑎᓂ ᐊᖏᖃᑎᒌᒍᑎᓂ ᐊᓯᖏᓐᓂᓗ ᓄᓇᓕᕐᔪᐊᓂ ᐃᓚᐅᑎᓪᓗᒍ ᓄᓇᖃᖅᑳᖅᓯᒪᔪᓄᑦ ᓴᐳᑎᔭᐅᒍᒪᔪᑦ ᓄᓇᐃᑦ ᐊᑐᐊᒐᖏᑦ ᐋᔅᑐᐃᓕᐊᒥ; ᓇᓗᓇᐃᔭᖅᑕᐅᓗᑎᓗ ᓄᓇᕐᔪᐊᓕᒫᒥ ᑲᑐᔾᔨᖃᑎᒌᑦᑐᑦ ᓴᐳᔾᔨᓂᕐᒧᑦ ᓄᓇᕐᔪᐊᑉ ᓄᓇᖓᓂ ᐃᓗᓕᖏᑦ ᓴᐳᔾᔨᓂᕐᒨᖓᔪᑦ ᐊᒻᒪᓗ ᐊᑐᓪᓚᕆᒍᑎᒋᓯᒪᔭᖓᑦ ᑕᒪᒃᑮᒃ ᐃᓚᐅᖃᑕᐅᔫᒃ ᐊᑐᖅᑕᐅᖏᓐᓇᕐᓗᓂᓗ. ᑕᒪᒃᑯᐊ ᐊᒥᓱᑦ ᐃᓱᒪᒋᔭᐅᓯᒪᔪᑦ ᐊᑐᖅᑕᐅᒍᓐᓇᖅᑐᓪᓗ ᐱᑕᖃᕇᖅᑐᑦ ᐊᑐᐊᒐᖅᑎᒍᑦ ᐱᓇᓱᐊᒐᖅᑎᒍᓪᓗ ᑭᓯᐊᓂᓕ ᐱᓇᓱᐊᕈᑎᐅᓪᓚᕆᒋᐊᓕᒃ ᐃᓕᑕᖅᓯᓂᖅ ᐊᑐᓕᖅᑎᑕᐅᓗᑎᓗ ᑕᒪᒃᑯᐊ ᐃᓱᒪᒋᔭᐅᓯᒪᔪᑦ ᒪᓕᒐᖅᑎᒍᑦ ᐊᑐᖅᑕᐅᒍᓐᓇᕐᓗᓂ ᑭᒃᑯᓕᒫᓄᑦ ᑲᓇᑕᓕᒫᒥᓪᓗ ᐃᓕᑕᖅᓯᒍᓐᓇᕐᓂᖅ ᐱᒻᒪᕆᐅᓂᖓᓂᒃ ᓄᓇᖃᖅᑳᖅᓯᒪᔪᑦ ᐃᓚᐅᒋᐊᖃᕐᓂᖓ ᑲᓇᑕᒥ ᑲᑎᖅᓱᖅᓯᒪᔪᓂ ᓴᐳᔾᔭᐅᓯᒪᓂᒃᑯᑦ ᐊᕙᑎᓂᒃ.

Date modified: